“დონალდ ტრამპთან საუბარი გულახდილი და შინაარსიანი იყო“ - სატელეფონო საუბარი, რომელიც 2 საათზე მეტხანს გაგრძელდა, დასრულდა: რა დეტალები ხდება ცნობილი
დონალდ ტრამპსა და ვლადიმერ პუტინს შორის სატელეფონო საუბარი დასრულდა. ინფორმაციას რუსული მედია ქვეყნის პრეზიდენტზე, ვლადიმერ პუტინზე დაყრდნობით ავრცელებს.
„დონალდ ტრამპთან საუბარი გულახდილი და შინაარსიანი იყო. მოსკოვი საომარი მოქმედებების შეწყვეტის მომხრეა, მაგრამ აუცილებელია მშვიდობისკენ მიმავალი ყველაზე ეფექტური გზების შემუშავება“, - განუცხადა ვლადიმერ პუტინმა ჟურნალისტებს.
ვლადიმერ პუტინის ცნობით, დონალდ ტრამპს მოსკოვსა და კიევს შორის პირდაპირი მოლაპარაკებების აღდგენაში მონაწილეობის გამო მადლობა გადაუხადა.
ამასთან, მისი თქმით, „რუსეთი მზადაა უკრაინასთან მემორანდუმზე მუშაობისთვის, მათ შორის ცეცხლის შეწყვეტის შეთანხმების შესახებ“.
აშშ-ისა და რუსეთის პრეზიდენტებს შორის საუბარი 2 საათზე მეტხანს გაგრძელდა.
რა დეტალები ხდება ცნობილისატელეფონო საუბრის შინაარსზე კომენტარი კრემლმაც გაავრცელა.
„ტრამპის პოზიცია ნეიტრალურია და ის მართლაც ერთვება კონფლიქტის მოწესრიგების პროცესში, მაშინ როდესაც ევროპელი პოლიტიკოსების პოზიცია ღიად პროუკრაინულია“, - აღნიშნულია განცხადებაში.
ტრამპთან საუბრის დეტალებს მოგვიანებით პესკოვი ან უშაკოვი გამოაქვეყნებენ.
“ვლადიმერ პუტინთან საუბარმა ძალიან კარგად ჩაიარა, რუსეთი და უკრაინა დაუყოვნებლივ დაიწყებენ მოლაპარაკებებს ცეცხლის შეწყვეტის შესახებ“ - ამის შესახებ აშშ-ის პრეზიდენტი დონალდ ტრამპი Truth Social-ზე რუსეთის პრეზიდენტთან, ვლადიმერ პუტინთან სატელეფონო საუბრის შემდეგ წერს.„ახლახან დავასრულე ორ-საათიანი საუბარი რუსეთის პრეზიდენტ ვლადიმერ პუტინთან. ვფიქრობ, ძალიან კარგად ჩაიარა. რუსეთი და უკრაინა დაუყოვნებლივ დაიწყებენ მოლაპარაკებებს ცეცხლის შეწყვეტის შესახებ და, რაც მთავარია, ომის დასასრულებლად. პირობების შესახებ მოლაპარაკებები მხარეებს შორის გაიმართება, რადგან მხოლოდ მათ იციან მოლაპარაკებების დეტალები, რაც სხვებისთვის უცნობია. საუბრის ტონი და სულისკვეთება შესანიშნავი იყო. ასე რომ არ იყოს ახლავე ვიტყოდი და არა მოგვიანებით“, - წერს დონალდ ტრამპი.
მისი თქმით, „რუსეთს აშშ-თან ფართომასშტაბიანი ვაჭრობა სურს, როგორც კი ეს კატასტროფული სისხლისღვრა დასრულდება“.
„ეს რუსეთისთვის შესანიშნავი შესაძლებლობაა, დიდი რაოდენობის სამუშაო ადგილებისა და სიმდიდრის შესაქმნელად. პოტენციალი უსაზღვროა. ასევე, უკრაინას შეუძლია ვაჭრობით დიდი სარგებელი მიიღოს, საკუთარი ქვეყნის აღდგენის პროცესში“, - აღნიშნავს აშშ-ის პრეზიდენტი.
ამასთან, აშშ-ის პრეზიდენტი აღნიშნავს, რომ რუსეთსა და უკრაინას შორის მოლაპარაკებები დაუყოვნებლივ დაიწყება.
„ამის შესახებ პრეზიდენტ პუტინთან საუბრის შემდეგ ვაცნობე უკრაინის პრეზიდენტ ვოლოდიმირ ზელენსკის, ევროკომისიის პრეზიდენტ ურსულა ფონ დერ ლაიენს, საფრანგეთის პრეზიდენტ ემანუელ მაკრონს, იტალიის პრემიერ-მინისტრ ჯორჯია მელონის, გერმანიის კანცლერ ფრიდრიხ მერცს და ფინეთის პრეზიდენტ ალექსანდრ სტუბს. ვატიკანმა, რომელსაც რომის პაპი წარმოადგენს, განაცხადა, რომ დაინტერესებულია მოლაპარაკებებს უმასპინძლოს. დაე, ეს პროცესი დაიწყოს“, - აცხადებს დონალდ ტრამპი.