ტერაქტი თურქეთში: სამი ტერორისტი თავდაცვით სამრეწველოში შეიჭრა, არიან დაღუპულები - კადრები ადგილიდან და ერდოღანის საგანგებო განცხადება
თურქეთში სამი ტერორისტი თავდაცვით სამრეწველოს თავს დაესხა, არიან გარდაცვლილები და დაჭრილები. ამის შესახებ ინფორმაციას თურქეთის შინაგან საქმეთა მინისტრი და თურქული მედია ავრცელებენ.
გამოცემა CNN Turk-ის ცნობით, სამი ტერორისტი თავს დაესხა ანკარის კარამანკაზანის უბანში მდებარე კომპანიას Turkish Aerospace Industries, რომელსაც მნიშვნელოვანი ადგილი უკავია თურქული შეიარაღების სისტემების განვითარებაში.
თურქული მედია ტერორისტების სურათებს ავრცელებს, რომლებმაც თავდასხმა განახორციელეს.
კადრებზე ჩანს, რომ სამი ტერორისტი, მათ შორის ერთი ქალი, კომპანიის კართან ტაქსით მივიდნენ, მანქანიდან ცეცხლსასროლი იარაღით გადმოვიდნენ და თავდასხმა განახორციელეს.
ოფიციალური პირების ცნობით, დაიღუპა 4 ადამიანი, დაშავდა 14. თურქეთის შინაგან საქმეთა მინისტრის თქმით, ორი ეჭვმიტანილი - ერთი მამაკაცი და ერთი ქალი - "ნეიტრალიზებულია". ჯერჯერობით უცნობია ვინ იდგა თავდასხმის უკან.
ტრაგედიას თურქეთის პრეზიდენტიც გამოეხმაურა: განცხადებაში ერდოღანი ხაზს უსვამს, რომ უსაფრთხოების ძალები სწრაფად მოქმედებდნენ საფრთხის გასანეიტრალებლად.
„არც ერთი ტერორისტული ორგანიზაცია, რომელიც მიზნად ისახავს ჩვენი უსაფრთხოების ხელყოფას, ვერ შეძლებს თავისი მიზნის მიღწევას“, - ამბობს ის.
საინფორმაციო სააგენტო Reuters-ის ცნობით, შემთხვევა დაგმო ვლადიმერ პუტინმაც და „სამძიმარი“ გამოთქვა.