"რუსეთის ბრძოლის ველზე დამარცხება შეუძლებელია" - რის შესახებ ისაუბრა პუტინმა ფედერალურ ასამბლეაში?
ამ წუთებში რუსეთის პრეზიდენტი ვლადიმერ პუტინი განცხადებას აკეთებს. მან სიტყვით გამოსვლის დასაწყისში აქცენტი გააკეთა იმაზე, თუ რატომ დაიწყო რუსეთმა "სპეციალური სამხედრო ოპერაცია."
"მე ვისაუბრებ ჩვენი ქვეყნისთვის რთულ დროს, ჩვენს სამყაროში ცვლილებების დროს. ისტორიული მოვლენები განსაზღვრავს ჩვენი ქვეყნის მომავალს, თოთოეულ ჩვენგანს უზარმაზარი პასუხისმგებლობა აკისრია", - განაცხადა რუსეთის პრეზიდენტმა.
მან დაადანაშაულა დასავლეთი და ნატო იმაში, რომ საჯაროდ საუბრობდნენ უკრაინისთვის ბირთვული იარაღის მიწოდებაზე რუსეთის შეჭრის წინ. მან დასავლეთი დაადანაშაულა ხალხთან და უკრაინასთან "ბინძურ თამაშში“.
პუტინის თქმით, რუსეთი უკრაინისგან ნაცისტური საფრთხის და მუდმივი მუქარის წინაშე იყო.
„ისინი უბრალოდ სახარჯო მასალად გადააქციეს. სამწუხაროა, მაგრამ ფაქტია და პასუხისმგებლობა ამაზე კიევსა და დასავლეთის ელიტებზეა. ერთი გარემოება ყველასთვის გასაგები უნდა იყოს - რაც უფრო მეტად შორი რადიუსის სისტემების მიწოდება მოხდება უკრაინისთვის, მით შორს გავხდებით იძულებული, რომ გავწიოთ საფრთხე ჩვენი საზღვრებიდან. დასავლეთი მიზნად ისახავს ლოკალური კონფლიქტი გლობალური დაპირისპირების ფაზაში გადაიყვანოს. ჩვენ ეს ასე გვესმის და ამაზე გვექნება შესაბამისი რეაგირება“, - განაცხადა პუტინმა.
ამასთან, როგორც პუტინმა აღნიშნა, რუსეთის ბრძოლის ველზე დამარცხება შეუძლებელია.
„რუსეთის ბრძოლის ველზე დამარცხება შეუძლებელია, ამიტომ აწარმოებენ სულ უფრო აგრესიულ საინფორმაციო თავდასხმას. გამუდმებით იტყუებიან, არ წყვეტენ თავდასხმას ჩვენს კულტურაზე, რუსეთის მართლმადიდებლურ ეკლესიაზე“,- განაცხადა პუტინმა.
რუსეთის პრეზიდენტმა თქვა, რომ რუსეთი ღია იყო დასავლეთთან დიალოგისთვის, რათა შექმნილიყო უსაფრთხოების თანაბარი სისტემა, მაგრამ "საპასუხოდ ვიღებდით არაკეთილსინდისიერ პასუხებს“ და კონკრეტულ ქმედებებს ნატოს გაფართოებისა და ევროპაში ახალი რაკეტსაწინააღმდეგო სისტემების განლაგების თაობაზე" - თქვა მან.
მისი თქმით, "მთელი პლანეტა სავსეა" ამერიკული ბაზებით.
"დასავლეთი გამოიყენებს ნებისმიერს - ტერორისტებს, ნაცისტებს, თვით ეშმაკსაც კი - რუსეთთან საბრძოლველად" - ამბობს პუტინი.