ესპანეთის ეროვნულმა პოლიციამ, მადრიდში ქართული დანაშაულებრივი დაჯგუფების 25 წევრი დააკავა - მათ მინიმუმ 14 სახლის ძარცვა ედებათ ბრალად
ესპანეთის ეროვნულმა პოლიციამ, მადრიდში ქართული დანაშაულებრივი დაჯგუფების 25 წევრი დააკავა, რომლებსაც ქვეყანაში მინიმუმ 14 სახლის ძარცვა ედებათ ბრალად, - ინფორმაციას ესპანური მედია ავრცელებს.
მათივე ინფორმაციით, ოპერაციის ფარგლებში სახლებში შვიდი ჩხრეკა ჩატარდა, ამოღებულია სამკაულები, ძვირფასი ქვები, მობილური ტელეფონები, ელექტრონული პლანშეტები, ლეპტოპები, ძვირადღირებული ტანსაცმელი და აქსესუარები, მუსიკალური ინსტრუმენტები და სხვა ნივთები.
მედიის ინფორმაციით, გამომძიებლებმა აღმოაჩინეს, რომ "ორგანიზაციას ჰქონდა ძალიან მძლავრი დანაშაულებრივი სტრუქტურა".
"ორგანიზაციაში იერარქია იყო მყარი და დაყოფილი იყო ნაწილებად, რაც "რკინის კოდექსით" იყო გამაგრებული. მის მიზანს წარმოადგენდა ლიდერის დაცვაც. ეს დაყოფა მას აქცევდა პოლიციისთვის მიუწვდომლად - იმ შემთხვევაში, თუ მის რომელიმე წევრს დააკავებდნენ, ორგანიზაციის ის ნაწილი, რომელსაც ის წარმოადგენდა, მომენტალურად გადაჯგუფდებოდა. ძარცვისთვის ისინი იყვნენ დაყოფილი ოპერატიულ ჯგუფებად, რომლებიც 2-5 ადამიანისგან შედგებოდა", - წერს ესპანური მედია.
მათივე ინფორმაციით, გამოძიება ჯერ არ დასრულებულა და არ არის გამორიცხული, კრიმინალური ორგანიზაციის სხვა წევრებიც დააკავონ.