რატომ არ უშვებენ არგენტინაში ორსული რუსი ქალების ნაწილს? - აკრძალვების ფონზე რუსებმა სხვა ქვეყნებში შესვლის ხერხს "მიაგნეს", თუმცა...
არგენტინაში რუსებისთვის ბინადრობის ნებართვის გაუქმება დაიწყეს. კანონი მხოლოდ რუსეთის იმ მოქალაქეებს ეხებათ, რომლებმაც არგენტინა ბავშვების დაბადების შემდეგ დატოვეს და ქვეყანაში საცხოვრებლად არ დარჩნენ.
ამ თემაზე მიგრაციის სამსახურის ეროვნულმა დირექტორმა, ფლორენცია კარინანომ ადგილობრივი ტელეარხის, C5N-ის ეთერში ისაუბრა.
"კანონის მიხედვით, ბინადრობის ნებართვას იმ რუსებს ვუჩერებთ, რომლებიც ჩვენს ქვეყანაში ბინადრობის ნებართვის მისაღებად ჩამოვიდნენ, რადგან მათი შვილი არგენტინელია, მაგრამ ისინი გაცილებით მეტ დროს ატარებენ ქვეყნის ფარგლებს გარეთ“, - ამბობს ფლორენცია კარინანო.თუ მათი საქმეები სასამართლომდე მივა, ჩვენი სამსახური მიუთითებს, რომ ბინადრობის ნებართვა შეჩერებულია, რადგან დოკუმენტის მფლობელებმა ერთი თვე გაატარეს არგენტინაში, ქვეყანა დატოვეს და უკან აღარ ჩამოსულან “, - დააზუსტა კარინიანომ.
ამ განცხადებამდე ცოტა ხნით ადრე გავრცელდა ინფორმაცია, რომ ექვსი ორსული რუსი ქალი არგენტინაში არ შეუშვეს, რადგან მათ მიერ გამოცხადებული ვიზიტის მიზანი "ყალბი აღმოჩნდა."
ახლა ყველა მათგანი არგენტინის ერთ-ერთ აეროპორტშია.
თანამემამულეების მხარდაჭერის მსურველი 14-მდე რუსი ბუენოს-აირესში მთავრობის შენობასთან ბანერებით მივიდა, სადაც ეწერა: "ორსულობა დანაშაული არ არის.“
ისინი მთავრობას მოუწოდებენ, რომ ქალები ქვეყანაში შეუშვან.
BBC-ის ინფორმაციით, ბოლო რამდენიმე თვის განმავლობაში ორსულობის ბოლო პერიოდში მყოფი ათასობით რუსი ქალი არგენტინაში ჩავიდა, რადგან სავარაუდოდ, მიზნად აქვთ, რომ მათმა შვილებმა არგენტინის მოქალაქეობა მიიღონ
ცნობისთვის, თუ ბავშვს არგენტინის მოქალაქეობა ექნება, მშობლებისთვისაც მარტივდება. არგენტინის პასპორტის მფლობელებს კი 171 ქვეყანაში შეუძლიათ უვიზოდ მოგზაურობა, რუსული პარსპორტით - 87 ქვეყანაში.
დასავლეთის ბევრ ქვეყანაში მოგზაურობა რუსეთის მოქალაქეებისთვის გართულდა მას შემდეგ, რაც რუსეთი უკრაინაში შეიჭრა. ქვეყნების ნაწილმა შეაჩერა რუსეთის მოქალაქეებზე ტურისტული ვიზების გაცემა.