თურქეთის მიწისძვრას ცნობილი სერიალის "ერთხელ ჩუქუროვაში" მსახიობი და მისი ქალიშვილი ემსხვერპლნენ
6 თებერვალს თურქეთისა და სირიის საზღვარზე მომხდარ მიწისძვრისას, ბოლო ინფორმაციით, 22 000-ზე მეტი ადამიანი დაიღუპა. მაშველები ნანგრევებში მოყოლილი ადამიანების ძებნას განაგრძობენ და გარდაცვლილთა რიცხვი ყოველდღიურად იზრდება.
დღეს გავრცელებულებული ინფორმაციით, მსხვერპლთა შორის არიან დედა-შვილი ემელ და ჰანდე პურიან ატიჩები.
თურქული სერიალების მოყვარულები მსახიობ ემელ ატიჩს სერიალ "ერთხელ ჩუქუროვადან“ იცნობენ. ქალი ერთ-ერთ ყველაზე პოპულარულ თურქულ სერიალში ეპიზოდურ როლს თამაშობდა.
სამძიმრის წერილს აქვეყნებს სერიალის ოფიციალური გვერდი:
"სამძიმარს ვუცხადებთ ჩვენი სერიალის ძვირფასი მსახიობის ემელ ატიჩისა და მისი საყვარელი ქალიშვილის ოჯახსა და ახლობლებს, ასევე მიწისძვრის შედეგად დაზარალებულ ყველა ჩვენს მოქალაქეს".
სამძიმრის წერილს აქვეყნებს სოციალურ ქსელში ბეიქოზის უნივერსიტეტის ოფიციალური გვერდიც .
”ჩვენ ღრმა მწუხარებას გამოვთქვამთ ჩვენი უნივერსიტეტის სამოქალაქო საჰაერო ტრანსპორტის მართვის პროგრამის კურსდამთავრებულის ჰანდე პურიან ატიჩისა და მისი დედის, ემელ ატიჩის, გარდაცვალების გამო. ვუსამძიმრებთ მის ოჯახს და გულშემატკივრებს...“
როგორც სოციალურ ქსელში გამოქვეყნებული პოსტებიდან ჩანს, დედა-შვილს ნათესავები და ახლობლები რამდენიმე დღის განმავლობაში ეძებდნენ. ისინი სოციალურ ქსელში წერდნენ, რომ მათთან დაკავშირებას ვერ ახერხებდნენ.