ვინ დაესხა ირანს დრონებით და რატომ დაიბარეს ამ ქვეყნის საგარეო უწყებაში უკრაინის საქმეთა რწმუნებული?
ვინ დაესხა ირანს დროენებით? - ეს ჯერ ისევ უცნობია. The Wall Street Journal-ი იმოწმებს ინკოგნიტო წყაროს - აშშ-ის ადმინისტრაციის წარმომადგენელს, რომელიც აცხადებს, რომ თავდასხმის უკან ისრაელი უნდა იყოს, თუმცა მომხდარის შესახებ ქვეყნის წარმომადგენლები ოფიციალურად კომენტარს არ აკეთებენ.
"ყველამ ვიცით ვის აქვს საკმარისი მოტივაცია და ტექნოლოგიური შესაძლებლობა იმისა, რომ ირანის სიღრმეში ასეულობით კილომეტრზე მსგავსი შეტევა განეხორციელებინა", - განაცხადა ანალიტიკოსმა ზურა ბატიაშვილმა "პალიტრანიუსის“ გადაცემა "ნიუსრუმში“, ირანის ტერიტორიაზე არსებულ სამხედრო ობიექტებზე მომხდარი ბოლოდროინდელი თავდასხმების შეაფასებისას.
როგორც ბატიაშვილმა აღნიშნა, აღნიშნულ თავდასხმებთან დაკავშირებით ოფიციალური განცხადება არც ირანს გაუკეთებია და არც ამის პოტენციურ ჩამდენს.
"ირანზე განხორციელდა შეტევა. მეორე საკითხია ვინ განახორციელა ის - ამასთან დაკავშირებით ოფიციალური განცხადება არც ირანს გაუკეთებია და არც იმას, ვისაც შეიძლება ეს შეტევა განეხორციელებინა, თუმცა ყველამ ვიცით, ვის აქვს საკმარისი მოტივაცია და ტექნოლოგიური შესაძლებლობა იმისა, რომ ირანის სიღრმეში ასეულობით კილომეტრზე განეხორციელებინა მსგავსი შეტევა.
ბევრი ამას შეიძლება უკავშირებდეს რუსეთ-უკრაინის ომს - კი, კავშირში არის, მაგრამ პირდაპირ კავშირში ნაკლებად. ახლო აღმოსავლეთი პრობლემებით დახუნძლული რეგიონია, მაგრამ რუსეთ-უკრაინის ომმა ისინი მეორე პლანზე გადაწია. ეს არ ნიშნავს, რომ ეს პრობლემები სადმე წავიდა. დროთა განმავლობაში ჩვენ ახლო აღმოსავლეთში კიდევ არაერთხელ დავინახავთ ძალიან დინამიურად განვითარებულ პროცესებს“, - განაცხადა ბატიაშვილმა.
მისივე შეფასებით, ამ ეტაპზე მხოლოდ ვარაუდის დონეზე ვართ, რადგან ინფორმაციის ნაკლებობას განვიცდით.
"ირანის ნომერ პირველი საგარეო პოლიტიკური პრიორიტეტი არის ისრაელის, როგორც სახელმწიფოს განადგურება. ამიტომ, ისრაელისთვის ძალიან სენსიტიური და ფაქიზია ირანის ბირთვული შეიარაღების თემა. ახლო აღმოსავლეთში ვხედავთ ძალიან საინტერესო კოალიციებსაც - ერთის მხრივ, ისრაელი, თურქეთი, აზერბაიჯანი ერთად და ირანი, რომელიც ამას მიიჩნევს ერთგვარ ალყაში მოქცევად - თანაც, თუ ამას საუდის არაბეთს დავუმატებთ, რომელიც ირანის ტრადიციული მოწინააღმდეგეა. არ უნდა დაგვავიწყდეს, რომ ირანის ის პრობლემები, რომელიც აქვს აშშ-სთან, გრძელდება და გრძელდება სანქციები, რომელიც ირანის წინააღმდეგ არის დაწესებული და არის მძიმე. ეს სანქციები ასევე მძიმეა ირანის მოსახლეობისთვისაც და ბოლო დროში ვხედავთ ძალიან ინტენსიურ საპროტესტო გამოსვლებს. თუ ადრე ვხედავდით, რომ ეს იყო რომელიმე ერთი კლასის პროტესტი, ახლა უკვე ყველა არის ჩართული და უფრო ინტენსიური არის. დროდადრო ეს უკმაყოფილება აალდება ხოლმე, ის არსად წასულა“, - განაცხადა ზურა ბატიაშვილმა.
აღსანიშნავია, რომ ირანმა ამ ქვეყანაში უკრაინის საქმეთა რწმუნებული იხმო მისი ქვეყნის კომენტარის გამო. შეგახსენებთ, უკრაინის პრეზიდენტის ოფისის ხელმძღვანელის მრჩეველმა, მიხაილო პოდოლიაკმა "ტვიტერზე" გაკეთებულ განცხადებაში ირანის ობიექტზე თავდასხმა პირდაპირ დაუკავშირა უკრაინაში ომს. უკრაინა ირანს ბრალად სდებს რუსეთისთვის ასეულობით დრონის მიწოდებაში. "აფეთქებების ღამე ირანში - დრონების და რაკეტების საწარმო, ნავთობგადამამუშავებელი საწარმო... გაგაფრთხილათ“, - დაწერა პოდოლიაკმა.
შარშან, დეკემბერში, პოდოლიაკი გამოვიდა მოწოდებით ირანის სამხედრო საწარმოების განადგურების და მიწოდებისთვის ხელის შეშლისკენ.
ირანი აღიარებს, რომ რუსეთს მიაწოდა დრონები, მაგრამ თეირანის მტკიცებით, ეს მოხდა უკრაინასთან ომის დაწყებამდე.
რუსეთი უარყოფს, რომ მისი ჯარი ირანულ დრონებს იყენებს უკრაინაში, თუმცა ჩამოგდებული საფრენი აპარატები ამას ადასტურებს.