რამდენად არის მოსალოდნელი, რომ ჩინეთში ახალი კოვიდაფეთქების შემთხვევაში, ახალი და უფრო აგრესიული შტამები წარმოიშვას?
მსოფლიოში კოვიდ სტატისტიკა თითქმის უკვე დასტაბილურებულია, მაგრამ ჩინეთში მიმდინარე საპროტესტო აქციებმა, კოვიდრეგულაციების გაუქმებასთან დაკავშირებით, მნიშვნელოვნად დაგვაფიქრა. საქმე ის არის, რომ მთელი პანდემიის განმავლობაში, ჩინეთმა მკაცრი რეგულაციების ქვეშ იცხოვრა, შესაბამისად, არ მოხერხდა საზოგადოებრივი იმუნიტეტის ჩამოყალიბება. ამის გამო არსებობს საფრთხე, რომ ჩინეთში კოვიდაფეთქება მოხდეს. ამის გათვალისწინებით, ხელისუფლება 1-2 შემთხვევის გამოც კი, დიდ ქალაქებში მკაცრ კარანტინს აცხადებს. ქვეყნის მოსახლეობას ამ პირობებში ცხოვრება მობეზრდა, სწორედ ამიტომაც მოიცვა დიდი ქალაქები საპროტესტო ტალღამ. შეგახსენებთ, ჩინეთში კოვიდრეგულაციების გაუქმების მოთხოვნით საპროტესტო მოძრაობა მას შედეგ დაიწყო, რაც ცეცხლმოკიდებული შენობიდან რეგულაციების გამო ხალხი არ გამოუშვეს, რასაც 10-მდე ადამიანი ემსხვერპლა. ჩინეთის პრეზიდენტის სი ძიპინის განცხადებით, რეგულაციები აუცილებელია, რადგან კოვიდინფიცირების მაჩვენებელი მკვეთრად არის გაზრდილი.
შესაძლებელია თუ არა, რომ ჩინეთში მასობრივ აფეთქებას ახალი შტამების წარმოშობა მოჰყვეს, რაც მსოფლიოში კვლავ გამოიწვევს კოვიდის მასობრივ გავრცელებას.
ჩინეთში მიმდინარე პროცესებზე ambebi.ge-თან ინფექციონისტმა ალექსანდრე გოგინავამ ისაუბრა.
"ჩინეთში, რომ ეპიდსიტუაცია უარესდება, ეს ფაქტია, მაგრამ, სამწუხაროდ, ჩინეთის კოვიდის მონაცემები ობიექტურად არ ქვეყნდება. ჩემი აზრით, ჯერ არანაირი საშიშროება არ არსებობს, რომ კოვიდის გლობალური გავრცელება მოხდეს. ასევე არც მსოფლიო ჯანდაცვის ორგანიზაციას აქვს საგანგაშო მონაცემები. ძირითადად, ცირკულირებს ომიკრონის ქვეშტამი, რომელიც კარგად ნაცნობია მსოფლიოსთვის. მას ნაკლებად ახასიათებს მძიმე შედეგების მოტანა. აქედან გამომდინარე, გლობალურ საფრთხეზე ლაპარაკი ზედმეტია და არ არსებობს საშიშროება, რომ კოვიდმა მსოფლიოში რაიმე რყევები გამოიწვიოს, როგორიც ეს 2 წლის წინ მოხდა. მაგრამ ეს იმას არ ნიშნავს, რომ ჩინეთში მიმდინარე მოვლენებზე თვალი უნდა დავხუჭოთ. აუცილებელია, ობიექტურად შეფასდეს ჩინეთში მიმდინარე მოვლენები“, - განაცხადა ინფექციონისტმა.