რუსეთი ტერორიზმის სპონსორ სახელმწიფოდ მსოფლიოს ქვეყნების უმეტესობამ უნდა აღიაროს - რას აცხადებს ვოლოდიმირ ზელენსკი?
უკრაინის პრეზიდენტი, ვოლოდიმირ ზელენსკი მსოფლიოს ყველა ქვეყანას მოუწოდებს, რუსეთი ტერორიზმის სპონსორ სახელმწიფოდ აღიარონ.
„რუსეთი, როგორც ტერორისტული სახელმწიფო, არის ტერორისტი ყველაფერში და იმსახურებს ყოველდღიურ გაძლიერებულ საერთაშორისო ზეწოლას“, - აღნიშნა ზელენსკიმ ტრადიციული მიმართვის დროს.
მან მადლობა გადაუხადა იმ ლიდერებსა და პოლიტიკოსებს, რომლებიც აცნობიერებენ, რომ რუსეთი ტერორისტული სახელმწიფოა.
„მადლობელი ვარ იმ ლიდერებისა და იმ პოლიტიკოსების, ვისაც ესმის და უზრუნველყოფს ამას. განსაკუთრებით მადლობელი ვარ პოლონეთის სენატის, რომელმაც მიიღო გადაწყვეტილება რუსეთი ტერორიზმის სპონსორ სახელმწიფოდ ოფიციალურად ეღიარებინა. ასეთი გადაწყვეტილება მსოფლიოს ქვეყნების უმეტესობამ უნდა მიიღოს. თავად რუსეთი თავისი ქმედებებით ალტერნატივას არ ტოვებს“, - აღნიშნა პრეზიდენტმა.