ტრასი გადადგა, ჯონსონი დაბრუნებას აპირებს? - რას წერს ბრიტანული მედია
ბრიტანული მედიის ცნობით, ბრიტანეთის ყოფილი პრემიერ-მინისტრი ბორის ჯონსონი "კონსერვატიული პარტიის" ლიდერის პოზიციისთვის ბრძოლას აპირებს. ინფორმაციას ამის შესახებ ბრიტანული გამოცემები Times და Daily Telegraph ავრცელებენ.
გამოცემების ცნობით, ბორის ჯონსონი, რომელიც სკანდალების სერიის შედეგად ივლისში იძულებული იყო "კონსერვატიული პარტიის" ლიდერის პოზიცია დაეტოვებინა, ახლა ემზადება იმავე პოზიციისთვის. Times-ის ცნობით, ჯონსონს ეს „ეროვნული ინტერესების” საკითხად მიაჩნია.
ამ მომენტისთვის "კონსერვატიული პარტიის" ლიდერის არჩევის ზუსტი წესები ჯერ არ არის გამჟღვანებული.
ცნობისთვის, ლიზ ტრასმა პრემიერ-მინისტრად არჩევიდან 45 დღის შემდეგ, გაერთიანებული სამეფოს პრემიერ-მინისტრის თანამდებობა დატოვა.
მისი თქმით, ის თანამდებობაზე მოვიდა "დიდი ეკონომიკური და საერთაშორისო არასტაბილურობის დროს."
"ვაღიარებ... მოცემულ სიტუაციაში არ შემიძლია მივიღო მანდატი, რომელიც კონსერვატიულმა პარტიამ არჩევის დროს მომცა“, - განაცხადა ლიზ ტრასმა.
აღსანიშნავია, რომ ტრასს გადადგომისკენ კონსერვატიული პარტიის დეპუტატებმა მას შემდეგ მოუწოდეს, რაც მთავრობა მისი ეკონომიკური პოლიტიკისგან გამოწვეული უკმაყოფილების შემდეგ არეულობამ მოიცვა.
47 წლის ტრასმა 5 სექტემბერს გაიმარჯვა მმართველი კონსერვატიული პარტიის კენჭისყრაში. ამომრჩეველთა აქტივობამ 82.6% შეადგინა. ჯამში კი 172 437 მოქალაქემ მისცა ხმა. ლიზ ტრასმა 81 326, ხოლო ყოფილმა ფინანსთა მინისტრმა კი 60 399 ხმა მიიღო. ტრასი, რომელიც ჯონსონის ადმინისტრაციაში საგარეო საქმეთა მინისტრი იყო, გახდა ბრიტანეთის მესამე ქალი პრემიერი - ტერეზა მეისა და მარგარეტ ტეტჩერის შემდეგ.