ძლიერი ხანძარი ყირიმის ხიდზე: რა ხდება ობიექტზე, რომელსაც რუსეთი ყველაზე მეტად იცავს?
ყირიმის ხიდის სარკინიგზო განშტოებაზე დილით ძლიერი ხანძარი გაჩნდა, - ამის შესახებ ოდესის საოლქო-სამხედრო ადმინისტრაციის ხელმძღვანელი, სერჰი ბრაჩუკი იუწყება.
"წინასწარი მონაცემებით, საწვავის ტერმინალი იწვის. ველოდებით ოფიციალურ ინფორმაციას!" - დაწერა მან სოციალურ ქსელში.
რუსული მედიის ცნობით, ხიდზე ძლიერი ხანძარია და იქ ხალხს არ უშვებენ. მათივე ინფორმაციით, ხიდზე საწვავის ავზი იწვის.
ვიდეოში, რომელიც ინტერნეტში ვრცელდება, ჩანს, რომ ხანძარი ხიდის რკინიგზის ნაწილს მოედო და მნიშვნელოვნად დაზიანდა საავტომობილო გზაც.
"ყირიმის ხიდი: გზა განადგურებულია, იწვის რკინიგზა. მშვენიერია!" - წერს დეპუტატი ოლექსი გონჩარენკო.
ცნობისთვის, ყირიმის, იგივე ქერჩის საავტომობილო და სარკინიგზო ხიდი, რომელიც რუსეთს ოკუპირებულ ყირიმთან აკავშირებს, 2016-2018 წლებში ააშენა რუსეთმა და ის 3,5 მილიარდი დოლარი დაჯდა. მისი სიგრძე დაახლოებით 18 კილომეტრია.
აღნიშნული ხიდი არის მთავარი საკომუნიკაციო არხი, რომლითაც ოკუპირებულ ნახევარკუნძულზე რუსული ტექნიკა და ჯარები შეჰყავთ.
"ეს არის ჩვენი ტერიტორია, ეს არის აკვატორია, რომელიც საზღვაო კანონის თანახმად ჩვენს ტერიტორიას ესაზღვრება… ეს ხიდი უკანონოდ აშენდა და მას ახლა იყენებენ უკრაინელი ხალხის, უკრაინის სახელმწიფოს გასანადგურებლად. ვფიქრობ, სწორედ თავად ყოვლისშემძლე მიუთითებს, რომ ასეთი ობიექტი, რაც შეიძლება მალე უნდა განადგურდეს" - აღნიშნა ორი თვის წინ ყირიმელი თათრების მეჯლისის თავმჯდომარემ, რეფატ ჩუბაროვმა.