"მეც ადამიანი ვარ" - ფინეთის პრემიერმა წვეულებაზე გადაღებული კადრების გავრცელების შემდეგ ბოდიში მოიხადა, სიტყვით გამოსვლისას კი ატირდა
ფინეთის პრემიერ-მინისტრი, სანა მარინი წვეულებაზე მისი გართობის ამსახველი ვიდეოსა და ფოტოების გავრცელების შემდეგ, ბოდიშს იხდის და ამბობს, რომ მისი პირადი ცხოვრების ამსახველი დეტალები არ უნდა გასაჯაროებულიყო.
სანა მარინმა ამ თემაზე საუბრის დროს ცრემლები ვერ შეიკავა.
ფინეთის პრემიერის თქმით, მას უნდა ჰქონდეს პირადი ცხოვრების უფლება. "მე ადამიანი ვარ“ - განაცხადა მარინმა სოციალ-დემოკრატიული პარტიის კონფერენციაზე და გასულ კვირაზე საუბრისას თქვა, რომ ეს მისთვის ძალიან რთული კვირა იყო.
"ამ მძიმე პერიოდში მეც მჭირდება ბედნიერება, სიმსუბუქე, მხიარულება, რაც ჩანს ფოტოებსა და ვიდეოებზე. ერთი სამუშაო დღეც კი არ გამომიტოვებია და მინდა მჯეროდეს, რომ ხალხი უფრო მეტად აფასებს იმას, თუ რას ვაკეთებ მე სამსახურში, ვიდრე იმას, თუ რას ვაკეთებ თავისუფალ დროს“, - თქვა სანა მარინმა.
მისივე თქმით, ერთი დავალებაც კი არ დაუტოვებია შეუსრულებელი და აკეთებს თავის საქმეს. "მე ვფიქრობ უკრაინაზე, ვფიქრობ თქვენზე, ჩემს ხალხზე და ვფიქრობ ჩემი საქმის შესრულებაზე“, - თქვა ფინეთის პრემიერმა.
ცნობისთვის, ფინეთის პრემიერ-მინისტრი წვეულებაზე გადაღებული კადრების შემდეგ ოპონენტთა მხრიდან მკაცრი კრიტიკის ობიექტი გახდა. მას ოპოზიციამ ნარკოტესტის ჩაბარებაც მოსთხოვა. მარინმა ნარკოტესტი გაიკეთა და მის სისხლში აკრძალული ნივთიერებები არ აღმოჩნდა.