ფინეთის პრემიერის სკანდალი - გავრცელდა ვიდეო, სადაც ჩანს, თუ როგორ ერთობა სანა მარინი წვეულებაზე - ოპოზიცია მოითხოვს, რომ მან ნარკოტესტი ჩააბაროს
ფინეთის პრემიერ-მინისტრი სანა მარინი კრიტიკის ობიექტი გახდა.კრიტიკის მიზეზი გავრცელებული ვიდეოა, სადაც ჩანს, თუ როგორ ერთობა ის წვეულებაზე.
კადრებში ჩანს, როგორ მღერის და ცეკვავს ფინეთის პირველი პირი მეგობრებთან ერთად. გავრცელებულ ვიდეოჩანაწერს მოჰყვა კრიტიკა ოპოზიციურ წრეებში და ოპოზიციის ერთ-ერთმა ლიდერმა სანა მარინს ნარკოლოგიური ტესტის გავლა მოსთხოვა.
36 წლის სანა მარინმა უარყო ნარკოტიკების მიღება. თქვა, რომ ის უბრალოდ ერთობოდა მეგობრებთან ერთად და ალკოჰოლს სვამდა. "მე ვცეკვავდი, ვმღეროდი, ვერთობოდი, ყოველივე სავსებით ლეგალური რამაა“, - თქვა ვიდეოს კომენტირებისას სანა მარინმა.
სანა მარინის ფოტო ერთ-ერთი მუსიკალური ფესტივალიდან
მსოფლიოს ყველაზე ახალგაზრდა პრემიერ-მინისტრი არ მალავს, რომ უყვარს წვეულებებზე სიარული. ცხოვრების წესის გამო ის არაერთხელ გამხდარა კრიტიკის ობიექტი. მარინი ხშირად სტუმრობს ღამის კლუბებსა და მუსიკალურ ფესტივალებს.
გასულ წელს მას ბოდიშის მოხდა მოუწია კლუბში წასვლის გამო მას შემდეგ რაც კოვიდით ინფიცირებულის ახლო კონტაქტი აღმოჩნდა.