"ვთხოვ ყველას, აუცილებლობის გარდა, არ გავიდნენ ქუჩებში" - რა ხდება ფრონტის ხაზზე უკრაინაში?
უკრაინის სამხრეთ-აღმოსავლეთით კვლავ ურთულესი მდგომარეობაა, სადაც რუსი ოკუპანტები მთელი ძალებით უტევენ უკრაინულ სოფლებსა და ქალაქებს.
26 მაისს კიდევ ერთხელ მიიტანეს სარაკეტო იერიში ქალაქ ხარკოვზე, რის შედეგადაც 7 მშვიდობიანი მოქალაქე დაიღუპა, 17 კი დაიჭრა, მათ შორის 9 წლის ბავშვიც. ამის თაობაზე ინფორმაცია ხარკოვის მხარის სამხედრო ადმინისტრაციის უფროსმა ოლეგ სინეგუბოვმა გაავრცელა.
"მტერი თავხედურად ბომბავდა ხარკოვს, დარტყმის ქვეშ აღმოჩნდნენ შევჩენკოს, პავლოვისა და კიევის რაიონები. ოკუპანტი კვლავ ატერორებს მშვიდობიან მოსახლეობას, ვთხოვ ყველას აუცილებლობის გარდა, არ გავიდნენ ქუჩებში, ხოლო საჰაერო განგაშის გაგონებისთანავე მიაშურონ თავშესაფრებს. მოდუნება ჯერ ადრეა", - განაცხადა სინეგუბოვმა და იქვე დასძინა, - უკრაინის შეიარაღებულმა ძალებმა თავისი საქმე იციან.
"ჩრდილოეთით, ჩრდილო-აღმოსავლეთით და იზიუმის მიმართულებით გრძელდება მძიმე ბრძოლები. მტერს მნიშვნელოვანი დანაკარგები აქვს. მტკიცედ ვდგავართ და ასევე ვიქნებით ყურადღებით, გვჯერა ჩვენი გამარჯვების", - აცხადებს ის გავრცელებულ ვიდეოში.
რუსმა ოკუპანტებმა დნეპროპეტროვსკის ოლქზეც რამდენიმე სარაკეტო შეტევა განახორციელეს. თავდასხმას სერიოზული ნგრევა მოჰყვა, - ინფორმაციას უკრაინული მედია დნეპროპეტროვსკის ოლქის სამხედრო ადმინისტრაციის ხელმძღვანელზე, ვალენტინ რეზნიჩენკოზე დაყრდნობით ავრცელებს.
"სერიოზული ნგრევა გვაქვს. მაშველები ნანგრევებს ასუფთავებენ და ადამიანებს ეძებენ", - აცხადებს ვალენტინ რეზნიჩენკო.
ამასთანავე, დნეპროპეტროვსკის საოლქო საბჭოს თავმჯდომარემ, ნიკოლაი ლუკაშუკმა განაცხადა, რომ ოკუპანტებმა დნეპრის რაიონი დაბომბეს. მისივე თქმით, ზუსტდება ინფორმაცია მსხვერპლისა და ნგრევის მასშტაბების შესახებ.
გაერთიანებული სამეფოს თავდაცვის სამინისტროს დაზვერვის განახლებულ ინფორმაციაში კი ვკითხულობთ, რომ რუსეთის სახმელეთო ჯარები კვლავ ცდილობენ სევეროდონეცკისა და ლისიჩანსკის ალყაში მოქცევას.
მათივე ცნობით, რუსულმა ძალებმა პოპასნაიას ჩრდილო-დასავლეთით რამდენიმე დასახლებული პუნქტი დაიკავეს.
ბრიტანეთის თავდაცვის უწყებაში ასევე აცხადებენ, რომ რუსეთი ზეწოლას ახდენს სევეროდონეცკზე, თუმცა უკრაინა ინარჩუნებს კონტროლს რამდენიმე დაცულ სექტორზე, რაც მეტყველებს, რომ რუსეთს დონბასზე სრული კონტროლი არ აქვს.
"რუსული ძალების სამხრეთ ჯგუფის ამოცანად, როგორც ჩანს, სამხრეთ უკრაინის ტერიტორიის ოკუპაცია რჩება. ბოლო დღეებში, რუსეთმა, სავარაუდოდ, 50 წლის T-62 ტიპის ტანკები რუსული ძალების სამხრეთ ჯგუფის პასუხისმგებლობის ზონაში გადაიტანა. T-62 ტანკები თითქმის დაუცველნი იქნებიან ტანკსაწინააღმდეგო იარაღის მიმართ და მათი ყოფნა ბრძოლის ველზე ხაზს უსვამს რუსეთის თანამედროვე, საბრძოლო მზადყოფნაში მყოფი აღჭურვილობის დეფიციტს“, - აღნიშნულია ანგარიშში.