თანამგზავრით გადაღებული ფოტოების მიხედვით, ბუჩას ქუჩებში გარდაცვლილი ადამიანები რუსეთის მიერ ქალაქის ოკუპაციის პერიოდში ჩანან- რა ფოტოებს აქვეყნებს NYT ?
The New York Times-მა ქალაქ ბუჩაში თანამგზავრით გადაღებული ფოტოები გააანალიზა და დაადგინა, რომ ბევრი მშვიდობიანი მოქალაქე სამ კვირაზე მეტი ხნის წინ დაიღუპა, ანუ იმ დროს, როდესაც ქალაქს რუსი სამხედროები აკონტროლებდნენ.
ერთ-ერთ ვიდეოში, რომელიც ადგილობრივი საკრებულოს წევრმა 2 აპრილს გადაიღო, ბუჩაში, იაბლონსკას ქუჩაზე გარდაცვლილი ადამიანებია ასახული. Maxar Technologies-ის მიერ გავრცელებული სატელიტური ფოტოები აჩვენებს, რომ დაღუპული ადამიანებიდან მინიმუმ 11 აღნიშნულ ქუჩაზე 11 მარტიდან ფიქსირდება, ანუ იმ დროიდან, როდესაც რუსეთმა ქალაქი დაიპყრო.
იაბლონსკას ქუჩაზე გადაღებულ მეორე ვიდეოზე კიდევ სამი ცხედარი ჩანს. მათგან ერთი ველოსიპედის გვერდით, ერთი კი - ავტომობილთან. სატელიტური გამოსახულებები აჩვენებს, რომ ავტომობილი და ცხედარი 20-21 მარტიდან ფიქსირდება.
შეგახსენებთ, რუსული მხარე ბუჩაში ჩადენილ მკვლელობებში მონაწილეობას უარყოფს და აცხადებს, რომ მშვიდობიანი მოქალაქეები მას შემდეგ დახოცეს, რაც რუსმა ჯარისკაცებმა ქალაქი დატოვეს.