დონალდ ტრამპი ჰილარი კლინტონს სასამართლოში უჩივის - რაში სდებს მას ბრალს აშშ-ის ექსპრეზიდენტი
აშშ-ს ყოფილი პრეზიდენტი, დონალდ ტრამპი ჰილარი კლინტონს და სხვა დემოკრატებს 2016 წლის საპრეზიდენტო არჩევნების დროს შეთქმულების მოწყობაში სდებს ბრალს. ტრამპი კლინტონს ადანაშაულებს იმაში, თითქოს კლინტონმა ტრამპსა და რუსეთს შორის არსებულ კავშირზე ხმები გაავრცელა. ყოფილი პრეზიდენტი, ფლორიდის ფედერალურ სასამართლოში შეტანილ 108 გვერდიან სარჩელში ცდილობს დაამტკიცოს, რომ მისი დამარცხება ჯო ბაიდენთან 2020 წლის არჩევნებში, სწორედ კლინტონის მიერ გავრცელებული ცნობების შედეგი იყო.
ჰილარი კლინტონის მომხრეები, 2016 წლის არჩევნებში ტრამპის გამარჯვებას, ექსპრეზიდენტის რუს აგენტებთან შეკვრას უკავშირებდნენ.
ამასთან, 2020 წელს აშშ-ის სენატის კომიტეტის მიერ გამოქვეყნებულმა 966 გვერდიანმა მოხსენებამ დაასკვნა, რომ რუსეთმა რესპუბლიკელი პოლიტიკური ოპერატორი - პოლ მანაფორტი და "ვიკილიქსის" ვებსაიტი გამოიყენა, რათა ტრამპს 2016 წლის არჩევნებში გამარჯვებაში დახმარებოდა. თავად მოსკოვი, აშშ-ს არჩევნებში ყოველგვარ მონაწილეობას უარყოფს.
ტრამპი მის მიერ სასამართლოში შეტანილი სარჩელით, მოითხოვს ფულად კომპენსაციას. ის ასევე ითხოვს სადამსჯელო ღონისძიებების გატარებასაც, რადგან, როგორც თვითონ ამბობს, სასამართლო პროცესის დროს იძულებული იყო გარკვეული რაოდენობის ხარჯები გაეღო. კერძოდ, 24 მილიონი დოლარი. ჰილარი კლინტონის წარმომადგენელმა ტრამპის ბრალდებების შესახებ კომენტარის გაკეთება არ ისურვა.