მარიუპოლში საკვებისა და წყლის ბოლო მარაგი იწურება- უკრაინული მედია | Allnews.Ge

მარიუპოლში საკვებისა და წყლის ბოლო მარაგი იწურება- უკრაინული მედია

მარიუპოლში საკვებისა და წყლის ბოლო მარაგი იწურება. ამის შესახებ მარიუპოლის საკრებულოს Telegram-ში გავრცელებულ განცხადებაშია ნათქვამი, რომელსაც "უნიანი" ავრცელებს.

განცხადებაში აღნიშნულია, რომ მარიუპოლში ვითარება კვლავაც ძალიან მძიმეა - „ქალაქში არ არის ელექტროენერგია, წყალი, გათბობა, თითქმის არ არის მობილური კავშირი, იწურება საკვების და წყლის ბოლო მარაგი“.

სიტუაციას ართულებს რუსი ოკუპანტების მუდმივი დაბომბვა.

"მტერი შეგნებულად ესვრის საცხოვრებელ უბნებს. დღეს რუსებმა განაგრძეს ქალაქის დაბომბვა თვითმფრინავებიდან. დაბომბეს საცხოვრებელი სექტორი ნახიმოვის გამზირისა და იტალიასკაიას ქუჩის კვეთაზე, ასევე იყო დარტყმები კინოთეატრ "სავონასთან". არის ინფორმაცია მარიუპოლის სახელმწიფო უნივერსიტეტის შენობის დაბომბვის შესახებ“, - აცხადებენ საკრებულოში.

ამასთან, აღნიშნულია, რომ მარიუპოლის დამცველები აგრძელებენ მტრის გმირულად შეკავებას.