"დამნაშავეებმა დაუყოვნებლივ უნდა აგონ პასუხი" - როგორ ეხმაურებიან თბილისში 5 ივლისს განვითარებულ მოვლენებს აშშ-სა და ევროპაში
ვგმობთ საქართველოში 5 ივლისს განხორციელებულ ძალადობრივ თავდასხმებს სამოქალაქო აქტივისტებზე, საზოგადოების წევრებსა და ჟურნალისტებზე, - ამის შესახებ აშშ-ის სახელმწიფო დეპარტამენტის პრესსპიკერი ნედ პრაისი "ტვიტერში“ წერს.
"საქართველოს ლიდერები და სამართალდამცავი ორგანოები ვალდებულნი არიან, დაიცვან გამოხატვისა და შეკრების თავისუფლების კონსტიტუციური უფლებები და დაადანაშაულონ ძალადობაში მონაწილე პირები,“ - წერს ნედ პრაისი.
თბილისში გუშინ განვითარებულ მოვლენებს ეხმიანება საქართველოში ჩეხეთის ელჩი, პეტრ მიკისკა.
"შოკირებული ვარ თბილისში ძალადობის, ჟურნალისტებსა და არასამთავრობო ორგანიზაციების ოფისებზე თავდასხმის სცენებით, დამნაშავეებმა დაუყოვნებლივ უნდა აგონ პასუხი. კონსტიტუციური უფლებები და თავისუფლებები კი აღდგენილ უნდა იქნას. საქართველოში დემოკრატიის ბედი სასწორზე დევს და ყველა აქტორმა, მათ შორის მთავრობამ, უნდა იმოქმედოს სრული პასუხისმგებლობით“, - წერს ელჩი.
თბილისში მომხდარ მოვლენებს სოციალურ ქსელ Twitter-ის მეშვეობით ეხმიანება ნიდერლანდების საგარეო საქმეთა სამინისტრო. როგორც უწყების განცხადებაშია ნათქვამი, ჟურნალისტებისა და LGBT პირების მიმართ ძალადობა და მუქარა სრულიად მიუღებელია.
"ნიდერლანდები მოუწოდებს საქართველოს ლიდერებსა და კანონის აღმასრულებელ პირებს დაიცვან შეკრებისა და გამოხატვის თავისუფლებები, რომლებიც მოქალაქეთა კონსტიტუციურ უფლებებს წარმოადგენს“, - ნათქვამია განცხადებაში.
ეუთო-ს დემოკრატიული ინსტიტუტებისა და ადამიანის უფლებათა ოფისი (ODIHR) თბილისში განვითარებული მოვლენების შემდეგ, აქტივისტებისა და ჟურნალისტების წინააღმდეგ თავდასხმების გამოძიებას ითხოვს.
"ოდირი შეშფოთებულია თბილისში ძალადობით და ასევე დაგეგმილი მშვიდობიანი შეკრების გაუქმების გამო. აქტივისტების, ჟურნალისტებისა და მათი საკუთრების წინააღმდეგ თითოეული ეს მიზანმიმართული თავდასხმა სწრაფად და სრულად უნდა იქნას გამოძიებული“, - ნათქვამია ეუთო/ოდირი განცხადებაში.
საქართველოს კონსტიტუცია უზრუნველყოფს მშვიდობიანი შეკრებისა და გამოხატვის უფლებას ყველასთვის და სახელმწიფოს ვალდებულებაა დაიცვას ეს თავისუფლება, - ამის შესახებ ევროპარლამენტარი ვიოლა ფონ კრამონი სოციალურ ქსელ "ტვიტერში“ წერს.
"როდესაც ძალადობრივი ჯგუფი სცემს ჟურნალისტებსა და LGBT +, როდესაც მთავრობა უყურებს, ეს კანონის უზენაესობის დანგრევის საშიში ნიშანია“, - წერს ევროპარლამენტარი.
მისი თქმით, როდესაც "ქართული ოცნების“ ლიდერები ვერ ახდენენ დამნაშავეების სათანდოდ დაგმობას, ისინი მხოლოდ ახალისებენ ძალადობას.
"როდესაც "ქართული ოცნების“ ლიდერები იმის ნაცვლად, რომ იმოქმედონ თავიანთი მანდატით, როგორც კონსტიტუციის გარანტებმა, სპეკულირებენ ამ თემასთან დაკავშირებით და ვერ ახდენენ დამნაშავეების სათანდოდ დაგმობას, ისინი მხოლოდ ახალისებენ ძალადობას“, - წერს ევროპარლამენტარი.
თბილისში განვითარებულ მოვლენებს სოციალურ ქსელ "ტვიტერის“ მეშვეობით კიდევ ერთი ევროპარლამენტარი პეტრას აუსტრევიჩუსი ეხმაურება.
"საქართველოს მმართველმა პარტიამ უნდა გაიგოს, რომ შესაძლო ევროპული პერსპექტივა ღირსებასა და პატივისცემას ეფუძნება. მოდი შევუნაჩრუნოთ სიცოცხლე ევროპულ ოცნებას ყველა ქართველისთვის“, - წერს ევროპარლამენტარი.
ევროპის საბჭოს ადამიანის უფლებათა კომისარი დუნია მიატოვიჩი კი სოციალურ ქსელ "ტვიტერში" წერს, რომ დამნაშავეები უნდა დაისაჯონ.
"აქტივისტებისა და ჟურნალისტების მიმართ #TbilisiPride21-ზე მომხდარი ძალადობა არის იმის სავალალო ილუსტრაცია, რომ საფრთხე შეიძლება განმეორდეს. ხელისუფლებას აქვს ადამიანის უფლებების დაცვის ვალდებულებები, რათა გამოხატვისა და შეკრების თავისუფლება შესაძლებელი იყოს და დემონსტრატები და ჟურნალისტები თავს დაცულად გრძნობდნენ. დამნაშავეები უნდა დაისაჯონ“, - წერს ევროპის საბჭოს ადამიანის უფლებათა კომისარი.
საგანგაშო სურათები საქართველოდან! ექსტრემისტი ხულიგნები ემუქრებიან ლგბტ "პრაიდს“ თბილისში, - ამის შესახებ ნიდერლანდელი დეპუტატი რუბენ ბრეკელმანსი "ტვიტერში“ წერს.
"თავისუფლებისა და დემოკრატიის სახალხო პარტია მოუწოდებს ხელისუფლებას დაიცვას მონაწილეები და ჟურნალისტები, ევროპელმა ლიდერებმა უნდა მოახდინონ ზეწოლა საქართველოზე, რათა დაუყოვნებლად დაიცვან თავისუფლება და თანაბარი უფლებები“, - წერს დეპუტატი.
გერმანელი დეპუტატი მაიკლ როთი საქართველოში LGBTI საზოგადოებას სოლიდარობას უცხადებს და მშვიდობიანი დემონსტრანტების წინააღმდეგ ძალადობას მიუღებელს უწოდებს.
"ჩემი სრული სოლიდარობა საქართველოში მათ, ვისაც სურთ, თავიანთი კონსტიტუციური უფლება, იყვნენ თავისუფლები და განსხვავებულები, მშვიდობიანად დაიცვან. ძალადობა LGBTI საზოგადოებისა და მშვიდობიანი დემონსტრანტების მიმართ შეუწყნარებელია“, - წერს გერმანელი კანონმდებელი.
გუშინ თბილისში მიმდინარე მოვლენებს Twitter-ზე გამოეხმაურა ასევე Amnesty International-ის გენერალური დირექტორი აგნეს კალამარდი.
კალამარდი აღშფოთებას გამოხატავს "თბილისი პრაიდის“ წინააღმდეგ განხორციელებული ძალადობით და პოლიციის უმოქმედობით.
“სრულიად აღშფოთებული ვარ თბილისი პრაიდის წინააღმდეგ განხორციელებული ძალადობითა და პოლიციის უმოქმედობით, როდესაც დაჯგუფებები თავს დაესხნენ "თბილისი პრაიდის“ ოფისს. საქართველოს აქვს LGBT ადამიანის გამოხატვისა და შეკრების თავისუფლების დაცვის ვალდებულებები. მათ უნდა გამოიძიონ და დასაჯონ ძალადობის ჩამდენი პირები”, - წერს კალამარდი.
ვგმობთ "თბილისი პრაიდი 2021-ის“ გამართვის ადგილებში ჟურნალისტებსა და ორგანიზატორებზე განხორციელებულ მუქარას და თავდასხმას, - ამის შესახებ კი გაერო-ს ადამიანის უფლებათა უმაღლესი კომისრის ოფისის განცხადებაშია აღნიშნული.
"მოვუწოდებთ საქართველოს ხელისუფლებას, დაიცვან მშვიდობიან შეკრებაში მონაწილეები და გამოიძიონ LGBTI პირების წინააღმდეგ მიმართული ძალადობრივი და დისკრიმინაციული ქმედებები. დამნაშავეებმა პასუხი უნდა აგონ“, - ნათქვამია განცხადებაში.