ბრიტანეთში "დიდი შვიდეულის" სამიტი მიმდინარეობს - ისტორიული ფოტოები კორნუელიდან
დიდ ბრიტანეთში, კორნოულში „დიდი შვიდეულის“ სამიტი მიმდინარეობს. საფრანგეთის, დიდი ბრიტანეთის, გერმანიის, აშშ-ს, კანადის, იაპონიის, იტალიის ლიდერები, ასევე ევროკომისიისა და ევროპული საბჭოს პრეზიდენტები პანდემიაზე, ვაქცინების გადანაწილების, კლიმატური ცვლილებების და რუსეთისგან მომდინარე საფრთხეების საკითხებზე მსჯელობენ.
მოლაპარაკებების დაწყებამდე მსოფლიო ლიდერებმა ტრადიციულად ერთობლივი ფოტოც გადაიღეს.
შეხვედრა დიდი ბრიტანეთის პრემიერ-მინისტრმა ბორის ჯონსონმა გახსნა და აღნიშნა, რომ მშვენიერია ყველას უშუალოდ ნახვა. ჯონსონის თქმით, მსოფლიო განიცდის "სავალალო პანდემიას“.
„ეს შეხვედრა საჭირო იყო, რადგან ჩვენ უნდა ვისწავლოთ პანდემიისგან და საჭიროა უზრუნველვყოთ, რომ აღარ განმეორდება შეცდომების ნაწილი, რომელიც ეჭვგარეშეა, გასული 18 თვის განმავლობაში მოხდა“, - განაცხადა ბორის ჯონსონმა.
მან აქვე აღნიშნა, რომ ქვეყნების ეკონომიკებს აღდგენა სჭირდება და არსებობს ოპტიმიზმის საფუძველი, რომ ეკონომიკას აღდგენის პოტენციალი აქვს. მან ხაზი გაუსვა თანასწორობის აუცილებლობას.
„მაგრამ სასიცოცხლოდ მნიშვნელოვანია აღარ გავიმეოროთ ის შეცდომები, რაც იყო წინა ფინანსური კრიზისი დროს, როცა აღდგენა არ მოხდა საზოგადოების ყველა ნაწილში“, - დასძინა პრემიერმა.
„დიდი შვიდეულის“ სამიტი 11-13 ივნისს იმართება.