დონალდ ტრამპის მხარდამჭერ ღონისძიებაზე ტეხასის შტატში ტბაში რამდენიმე ნავი ჩაიძირა | Allnews.Ge

დონალდ ტრამპის მხარდამჭერ ღონისძიებაზე ტეხასის შტატში ტბაში რამდენიმე ნავი ჩაიძირა

აშშ-ის პრეზიდენტის, დონალდ ტრამპის მხარდამჭერ ღონისძიებაზე ტეხასის შტატში რამდენიმე ნავი ჩაიძირა. "როიტერის" ინფორმაციით, ნავების აღლუმი ტრევისის ტბაზე იყო ორგანიზებული.

გავრცელებული ინფორმაციით, ტბაში ერთდროულად ბევრი ნავის ყოფნამ ტალღები წარმოშვა, რა დროსაც მინიმუმ 4 ნავი ჩაიძირა, ნავების ნაწილი კი კლდეებს შეეჯახა. ადგილობრივი ხელისუფლების ინფორმაციით, ინციდენტის შედეგად არავინ დაშავებულა.

ღონისძება სახელწოდებით "ტრევისის ტბის ნავების აღლუმი ტრამპისთვის" სოციალურ ქსელ "ფეისბუქში" დაანონსდა, სადაც ყველა ფორმისა და ზომის ნავების მეპატრონეებს აღლუმში მონაწილეობისკენ მოუწოდებდნენ.

ტრევისის ტბა არის წყალსაცავი მდინარე კოლორადოზე, რომელიც პოპულარული ადგილია ნაოსნობისთვის, თევზაობისთვის, ცურვისა და სხვა გასართობი აქტივობებისთვის.