ჩრდილოეთ და სამხრეთ კორეა ემზადება, რომ ომი ოფიციალურად დაასრულოს
ჩრდილოეთ და სამხრეთ კორეა ემზადება, რომ ომი ოფიციალურად დაასრულოს - აღნიშნულ ინფორმაციას USA TODAY სამხრეთ კორეის ყოველდღიურ გაზეთზე Munhwa Ilbo-ზე დაყრდნობით ავრცელებს.
გამოცემის თქმით, ნახევარკუნძულზე მდებარე ეს ორი ქვეყანა ტექნიკურად ჯერ კიდევ საომარ ვითარებაში იმყოფება, რადგან 1950-53 წლის კორეის კონფლიქტი ზავით დასრულდა და არა სამშვიდობო შეთანხმებით.
ადგილობრივი მედიის ცნობით, რომელიც ინფორმაციას სამხრეთ კორეის ოფიციალურ, თუმცა, ანონიმურ წყაროზე დაყრდნობით ავრცელებს, ფხენიანი და სეული საომარი ვითარების სამუდამო დასრულების შესახებ დისკუსიებს მართავს.
როგორც ცნობილია, ჩრდილოეთ კორეის ლიდერის კიმ ჩენ ინისა და სამხრეთ კორეის პრეზიდენტის მუნ ჯე ინის ისტორიული შეხვედრა 27 აპრილს სამხრეთ კორეის ტერიტორიაზეა ჩანიშნული. ეს 1950-იანი წლების შემდეგ პირველი შემთხვევა იქნება, როდესაც ჩრდილოეთ კორეის ლიდერი სამხრეთ კორეის მიწაზე ფეხს დადგამს. შეხვედრისას მხარეები, შესაძლოა, ასევე შეთანხმდნენ გამაგრებული დემილიტარიზაციის ზონიდან სამხედრო შენაერთების ნაწილის გაყვანაზე. ასევე ცნობილია, რომ კიმ ჩენ ინი ამერიკის შეერთებული შტატების პრეზიდენტ დონალდ ტრამპთან აპირებს შეხვედრას.