რუსეთში შესაძლოა YouTube-სა და Instagram-ზე წვდომა დაიბლოკოს
რუსეთის კავშირგაბმულობისა და კომუნიკაციების მინისტრი ნიკოლაი ნიკიფოროვი არ გამორიცხავს, რომ ბიზნესმენ ოლეგ დერიპასკას სარჩელის გამო, რუსეთში YouTube-სა და Instagram-ზე წვდომა დაიბლოკოს.
"თუ ინტერნეტ-რესურსები არ იცავენ რუსულ კანონებს ან არ ასრულებენ რუსული სასამართლოების გადაწყვეტილებებს, კანონის შესაბამისად მათზე წვდომა შესაძლოა დაიბლოკოს", - განუცხადა ნიკიფოროვმა „რია ნოვოსტის".
მანამდე მედიასა და სოციალურ ქსელებში გავრცელდა ვიდეორგოლი, რომელშიც რუსი ოპოზიციონერი ალექსეი ნავალნი ოლეგ დერიპასკას კანონის დარღვევაში ადანაშაულებს. დერიპასკამ ღირსებისა და პატივის დაცვის მიზნით სასამართლოს მიმართა.
სასამართლოს გადაწყვეტილებით, იმ ინტერნეტ-რესურსებზე, სადაც აღნიშნული ვიდეორგოლი იყო განთავსებული, სარჩელზე გადაწყვეტილების გამოტანამდე წვდომა აიკრძალა.