ამერიკას ყველაზე ძლიერი ქარიშხალი "ირმა" ემუქრება - მოსახლეობა მოსალოდნელი საფრთხის შესახებ გაფრთხილებულია
ამერიკას კიდევ ერთი ქარიშხალი უახლოვდება, რომელსაც "ირმა" უწოდეს. ის სულ უფრო ძლიერდება. მას მეხუთე კატეგორია უკვე მიანიჭეს. ქარის სიჩქარე უკვე აღწევს 220 კილომეტრს საათში. პუერტო-რიკოსა და აშშ-ს ფლორიდის შტატში უკვე გამოცხადებულია საგანგებო მდგომარეობა.
სპეციალისტების პროგნოზით, იმ ტერიტორიებზე, სადაც შტორმია მოსალოდნელი, 25 სანტიმეტრის ოდენობით ნალექს ელოდებიან, ტალღების სიმაღლე კი რვა მეტრს მიაღწევს.
აშშ-ის შესაბამისი სამსახური მოსახლეობას მოსალოდნელი საფრთხის შესახებ აფრთხილებს და სათანადო რეკომენდაციებით მიმართავს, რაც სურსათისა და სასმელი წყლის რამდენიმედღიანი მარაგის შევსებას ეხება. ფლორიდის გუბერნატორმა "თვითერზე" სპეციალური გვერდი გახსნა, რომლიდანაც აქტიურად ხდება მოსახლეობის ინფორმირება. ის მოსახლეობას უარესის მოლოდინის შესახებ აფრთხილებს.