"რუსები ტურისტები არ არიან, აქ დამკვიდრდნენ, ჩვენთან ფულს არ ხარჯავენ... " - ბათუმში ჩავარდნილ სეზონზე საუბრობენ
აჭარაში ტურისტული სეზონი აქტიურ ფაზაშია, თუმცა სხვადასხვა სეგმენტში დასაქმებულები Ambebi.ge-სთან საუბარში ჩავარდნილ ტურისტულ სეზონზე საუბრობენ. ამბობენ, რომ გასულ წელთან შედარებით, რეგიონში ვიზიტორთა რაოდენობამ საგრძნობლად იკლო.
აჭარის მთავრობამ საზაფხულო სეზონი ოფიციალურად 3 ივნისს საზეიმო ვითარებაში გახსნა, თუმცა ხალხმრავალ ტურისტულ ადგილებში დასაქმებულები ამბობენ, რომ წელს უმუშევარი დარჩნენ, საკუთარ პროდუქციას ვერ ყიდიან, ასევე ტურისტების ნაკლებობაზეც საუბრობენ "იახტკლუბში" მომუშავეებიც.
რესპონდენტების თქმით, შეზლონგებზე, კვების ობიექტებზე, ბინების ფასებზე, იახტებსა და სხვა სერვისებზე ფასები არ შეცვლილა. მოქალაქეები ამბობენ, რომ ტურისტული სეზონის ჩავარდნა, სავარაუდოდ, ზღვის წყლის ხარისხზე გავრცელებულ ინფორმაციას უკავშირდება.
მათი თქმით, მიუხედავად ზღვის წყლის ხარისხის კვლევებისა, ტურისტებს არ სჯერათ, რომ ზღვაზე დასვენება უსაფრთხოა და ამიტომ, შესაძლოა, ამ მიზეზით ვიზიტორთა ნაკადმა იკლო. “გასულ წელთან შედარებით მუშაობა ნაკლებად გვაქვს, შარშან უფრო მეტი ტურისტი იყო. წინა წელს არაბები და რუსები იყვნენ, რომლებიც ტურისტულ ადგილებში ფულს ხარჯავდნენ, წელს იმავეს ვერ ვიტყვით. ჩვენი ინფორმაციით, ზღვის ხარისხზე გავრცელებული ინფორმაციის გამო უამრავმა ტურისტმა აჭარა დატოვა. თბილისიდანაც არ მოდიან, ახლახან თბილისში ვიყავი და ამბობდნენ, ბათუმში ჩასვლა არ ღირს, ზღვა მოწამლულია და ჩასვლა არ შეიძლებაო. ტურისტების შემცირებას სწორედ ამას ვუკავშირებთ” , - განაცხადა ადგილობრივმა ნესტან ფაღავამ.
“აქ დასაქმებულებმა ახალი იახტები და საცურაო საშუალებები ჩამოიყვანეს, მათ დიდი ფინანსური ზიანი მიიღეს. ტურისტი არ არის, იახტაზე დასაქმებულები ტურისტების დასწრებაზე ვართ, თუ ვინმე გამოჩნდა სანაპიროზე… რუსები ტურისტები არ არიან, ისინი აქ დამკვიდრდნენ და თავიანთი გახსნეს ყველაფერი, ჩვენთან ფულს არ ხარჯავენ და არც ვთვლით მათ ტურისტებად” - გვითხრეს "იახტკლუბში".
“ელექტრომობილებთან რიგები იდგა, თქვენც ხედავთ, მოდით გადაიღეთ, ნახეთ, შუადღეა და ამ დრომდე არცერთი ტურისტი არ მოსულა. ისევ ახლობლები თუ გამოივლიან და იმათ გავასეირნებთ. ტყუილად ვდგავართ მთელი დღეა. გადასახადები გვაქვს. ვგეგმავდით ელექტრომობილების დამატებას და კიდევ კარგი ეგ ფინანსური დავალიანებაც არ ავიღეთ” - ამბობს ბათუმის სანაპიროსთან მყოფი ელექტრომობილის მეპატრონე.
“მოგეხსენებათ აჭარაში /ბათუმში ხშირად არის არასტაბილური ამინდი, რაც შეიძლება ითქვას, რომ ამცირებს ტურისტულ სეზონს და ისედაც ჩავარდნილ სეზონზე აღარ გვიწევს მუშაობა. სუვენირების მაღაზია მაქვს გახსნილი, იჯარაში 8000 ლარს ვიხდი, აფხაზეთიდან დევნილი ვარ, რით ვირჩინოთ თავი. ასეთი სეზონი კოვიდის შემდეგ არ ყოფილა. წარმოიდგინე, პანდემია დასრულდა და იმ წელს უფრო კარგი მუშაობა გვქონდა, ვიდრე ახლა”, - ამბობს სუვენირებით მოვაჭრე პირი. იხილეთ სრულად