"2013 წელს იაპონიის განათლების სამინისტროს პროგრამით ჩამოვედი სამწლიანი მაგისტრატურის კურსზე და შემოვრჩი"- ქართველი გოგონას საოცარი იაპონური თავგადასავალი
მარიამ ინაბა უკვე ათ წელზე მეტია იაპონიაში ცხოვრობს... "ერთი ჩვეულებრივი ქართველი, იაპონური მითების დამანგრეველი გოგოს გვერდი" - გვატყობინებს მისი სოციალური ქსელი. უფრო მეტის გასაგებად მარიამს დავუკავშირდით:
- მარიამ, გვიამბეთ, როგორი იყო საქართველოში გატარებული ბავშვობა, მშობლები, პედაგოგები, გარემო, ჰობი, გატაცებები...
- დავიბადე თბილისში. თავიდან საჯარო სკოლაში დავდიოდი. მეოთხე კლასამდე ვიარე, შემდეგ დედამ კერძო სკოლა იპოვა და იქ გადამიყვანა. დავამთავრე "მთიები“, პირველი გამოშვება იყო ჩვენი კლასი. საჯაროშიც და კერძოშიც ძალიან კარგი მასწავლებლები მყავდა. რაკიღა მთიებში„ უფრო მეტი დრო მაქვს გატარებული, ძირითადი აქცენტი იქაურ მასწავლებლებზე მექნება. ყველაფერს აკეთებდნენ ჩვენი კლასის აღმზრდელები და დირექტორი, ჩვენ რომ მეგობრული გარემო გვქონოდა. ბულინგი და ერთმანეთის ჩაგვრა არც მახსენდება, რომ ყოფილიყო. ასეთ გარემოში აღზრდა ძალიან სასარგებლო აღმოჩნდა ჩემთვის. ბევრი რამ ვისწავლე. ახლანდელი ჰობი ფოტო/ვიდეოების გადაღებაა. რადგან ბლოგი მაქვს, ვცდილობ ახალ-ახალი ადგილები და საინტერესო ამბები მოვაგროვო, რომ მერე ჩემს გამომწერებს გავუზიარო. ძალიან აქტიური ვარ, არ მიყვარს ერთ ადგილას ჯდომა და ყოფნა. სულ მინდა, რომ რაღაც ახალი ვისწავლო ან ახალი გამოცდილება მივიღო.
- როდის დაინტერესდით იაპონური ენით, ქვეყნით...
- იაპონური ენით მეშვიდე კლასში დავინტერესდი, როცა სკოლაში ესპანურსა და იაპონურს შორის არჩევანის გაკეთება მომიწია. ავირჩიე იაპონური და მის მერე კავშირი არ გამიწყვეტია.
- როგორ შეძელით ენა ასე სრულყოფილად გესწავლათ და როდის ეწვიეთ პირველად იაპონიას, პირველი შთაბეჭდილებები როგორი იყო?
- სკოლიდან უნივერსიტეტში გავაგრძელე სწავლა. 2013 წელს იაპონიის განათლების სამინისტროს პროგრამით ჩამოვედი სამწლიანი მაგისტრატურის კურსზე და შემოვრჩი. როცა რომელიმე უცხო ქვეყანაში ცხოვრობ და მხოლოდ მათი ენა გესმის, მარტივად გამახსოვრდება დროთა განმავლობაში და ცოტა ხელსაც თუ შეუწყობ, „მათიანიც“ გახდები. რა თქმა უნდა, აუცილებელია გარკვეული საბაზისო ცოდნა.
- რატომ აირჩიეთ კიოტო, როგორია მათი წეს-ჩვეულებები და გვიამბე, რაზე მუშაობდი იქ?
- კიოტოში ყველაზე ბევრი ძველი ტაძარი და ისტორიული უბნებია შემორჩენილი. რადგანაც მაგისტრატურაზე რელიგიების სწავლა გადავწყვიტე, კიოტო ამისთვის საუკეთესო ქალაქი იყო. ზოგადად იაპონიაში როცა ჩამოდიხართ მოკლე თუ გრძელი ვიზიტით, სასურველია მათი წეს-ჩვეულებები და კულტურა ასე თუ ისე იცოდეთ, განსაკუთრებით თუ ხანგრძლივად მოდიხართ, თუ გინდათ, რომ მიგიღონ ადგილობრივებმა და როგორც ყველა უცხოელს, ისე არ შემოგხედონ, აუცილებლად უნდა გქონდეთ გააზრებული, სად მოდიხართ და მზად უნდა იყოთ, მათი უძველესი კულტურის და ტრადიციების მიღებისთვის.