"კინო აღარასდროს იქნება ისეთი მიმზიდველი, როგორც ბელმონდოს დროს იყო" - სკანდალები, დიდი პირადი ტრაგედია და კაცი "უცხო ქარიზმით"
გატეხილი ცხვირი, უნიკალური სტილი და თაღლითური ღიმილი - ეს ფრანგი მსახიობის, ჟან-პოლ ბელმონდოს ის მახასიათებლებია, რომლებიც ყველასგან გამოარჩევდა და რომლითაც თავის განსაკუთრებულ ხელწერას ტოვებდა.
ფილმიდან Borsalino - 1970 წელი
"მეამბოხე სული", "ფრანგი მსახიობების ახალი ტალღის სახე", "ლეგენდა", "კაცი, რომელმაც ევროპული კინოს ეპოქა შექმნა" - ასე მოიხსენიებენ კინოკრიტიკოსები დღეს მსახიობს, რომელიც 88 წლის ასაკში 6 სექტემბერს გარდაიცვალა.
A Bout de Souffle არის პირველი ფილმი, რომელშიც ბელმონდომ მონაწილეობა მიიღო
ბელმონდო და ფრანგული კინოკლასიკა განუყოფელი ნაწილია. სამსახიობო შესრულების მანერით, უცნაური, ყველასგან განსხვავებული ღიმილით მან ადამიანების გულებში მარტივად შეაღწია.
ჟან-პოლ ბელმონდო და სოფი ლორენი ფილმიდან La Ciociara - 1960 წელი
ადრეული წლები
ჟან-პოლ ბელმონდო 1933 წლის 9 აპრილს, პარიზის გარეუბანში დაიბადა. მისი მამა მოქანდაკე პოლ ბელმონდო იყო, რომლის ნამუშევრებიც დღეს პარიზულ პარკებს ამშვენებს. მომავალი მსახიობის დედა, სარა მხატვარი იყო. ჟან-პოლ ბელმონდო მოგვიანებით ერთ-ერთ ინტერვიუში ამბობდა, რომ ბოჰემურმა ატმოსფერომ, რომელშიც იზრდებოდა, მის პიროვნებაზე და ასევე ცხოვრების გზაზე, დიდი გავლენა მოახდინა.
ფილმიდან - L’homme de Rio
კრივის სიყვარული
მოზარდობის პერიოდმა საკმაოდ რთულად ჩაიარა - მისი ცხოვრებაც ჰგავდა ტიპური, გარეუბნელი ფრანგი ბიჭის ცხოვრებას, ჩხუბი თანატოლებთან მისი ყოველდღიურობის ნაწილი იყო. გარდა ამისა, კრივი ყველაზე მეტად იზიდავდა. ბელმონდომ სკოლაში სწავლაზე უარი თქვა და მოყვარული მოკრივე გახდა.
ბელმონდოს, როგორც მოკრივის დებიუტი 1949 წლის 10 მაისს შედგა, რა დროსაც თავისი მოწინააღმდეგე, რენე დესმარაისი პირველივე რაუნდში ნოკაუტით დაამარცხა. მისი სპორტული კარიერა წარმატებით გრძელდებოდა, დაუმარცხებელი იყო, თუმცა მალევე თავად თქვა უარი ამ სპორტზე.