"ყველა ფილა სხვადასხვაა, ორ ერთნაირს ვერავინ ნახავს"- გაიცანით გოგონა, რომელმაც გორის ცენტრალურ მოედანზე უნიკალური კერამიკული პანო შექმნა
„1001 ქართული ორნამენტი“ - ეს პროექტი დიდი ხნის წინ იყო ჩაფიქრებული, რომელშიც დიდი შრომა, ემოცია და ენერგია ჩაიდო - ამბობს საოცარი იდეის ავტორი, თვითნასწავლი კერამიკოსი უნიკალურ მხატვრულ პანოზე, რომელიც 1001 ხელნაკეთი, ასევე ხელით მოხატული, კერამიკული ფილისგან შეიქმნა. დაინტერესებულ ადამიანებს უკვე შეუძლიათ გორში, ამილახვრის ქუჩაზე, გოგებაშვილის სკვერში ამის ნახვა, გულდასმით დათვალიერება და ამ საოცარი ნამუშევრით სიამოვნების მიღება. ირინა შოთაძეს იმედი აქვს, რომ გორელები და ქალაქის სტუმრები პანოს შეიყვარებენ და თითოეულ ფილას მოუფრთხილდებიან.
„ძალიან ბევრი მეკითხება - რატომ მაინცდამაინც 1001? როდესაც ამ პროექტის იდეა გაჩნდა და ქართული ორნამენტების მოძიება დავიწყე, მათი ერთობლიობა წარმოვიდგინე, როგორ ზღაპრულ სანახაობას შექმნიდა. ამავდროულად, გაჩნდა კითხვები - რამდენი უნდა ყოფილიყო ეს ფილა და რა შეიძლებოდა, რქმეოდა... ამ კითხვებზე პასუხი სიტყვა ზღაპარმა მომცა და რა თქმა უნდა, „1001 ქართული ორნამენტი,“ - აღნიშნავს ირინა შოთაძე, რომელიც იდეის დაბადების შესახებაც გვიყვება:
- წარმოშობით გორიდან ვარ, სადაც ზაფხულობით ჩავდიოდი ხოლმე. სულ ვფიქრობდი, რომ ამ პატარა და ლამაზი ქალაქის კიდევ მეტად გასაფერადებლად რა იქნებოდა კარგი, რაც ახალ ფერებს და სიხალისეს შესძენდა. ეს კი ტურისტულად დატვირთული ქალაქის ცხოვრებაშიც ერთ ლამაზ შტრიხს შეიტანდა. ამასთან, რადგან კერამიკული პანოების, კომპოზიციების მიმართ, ინტერესი მქონდა და მიზიდავდა, ამიტომ მშურდა პორტუგალიის პანოების, ქვეყნის, სადაც კერამიკული საოცარი კომპოზიციებია შენობებზე. რატომ არ შეიძლებოდა, რაიმე ამ მიმართულებით ჩვენთანაც გაკეთებულიყო? მით უფრო, რომ აქ თიხაც მოიპოვება და ნიჭიერი კერამიკოსებიც არიან. მოკლედ, იდეა ასე მოვიდა, რომელიც თანდათან დაიხვეწა.
- და საბოლოოდ საოცარი ნამუშევარი შეიქმნა. რამხელაა პანო მოცულობით?
- 7/3-ზე - 21 კვადრატული მეტრი... ის გორის ცენტრალურ მოედანზე, ცენტრალურ ნაწილში საჯარო სივრცეში გაკეთდა. მას ნახავენ როგორც ადგილობრივები და რეგიონის მაცხოვრებლები, ასევე გათვალისიწინებულია, რომ ტურისტებმაც ნახონ. ყველა ფილა სხვადასხვაა - ორ ერთნაირს იქ ვერავინ ნახავთ.
- როდის დაიწყეთ მუშაობა?
- გასულ ზაფხულს ვმუშაობდით. მერე პანდემიამ შეგვაფერხა. ზამთრის პერიოდშიც გაკვრა არ არის სასურველი და მოკლედ, ახლა ზაფხულში სამუშაოები აქტიურად განვაახლეთ და პროექტი აგვისტოს ბოლოს დავასრულეთ. მხარში დაგვიდგა გორის მერია და პროექტი მათი თანადაფინანსებით განხორციელდა, თუმცა ძირითადი თანხა ჩემი იყო.