პეკინის ქუჩა ცალმხრივი იქნება - შეიცვლება სატრანსპორტო მოძრაობის გეგმა
რეაბილიტირებულ პეკინის ქუჩაზე სატრანსპორტო მოძრაობა ცალმხრივი იქნება, - ამის შესახებ "ინტერპრესნიუსს" თბილისის მერიის კეთილმოწყობის საქალაქო სამსახურის უფროსმა გივი კუბლაშვილმა განუცხადა.
მისი თქმით, 15 სექტემბრისთვის მათი სამსახური პეკინის ქუჩაზე სამუშაოებს სრულად დაასრულებს. შაბათ-კვირას კი, ტრანსპორტის საქალაქო სამსახური ქუჩის დახაზვის სამუშაოებს განახორცილებს. 18 სექტემბრისთვის კი, ქუჩა მთლიანად განახლებული იქნება. რაც შეეხება გამწვანების სამუშაოებს, იგი სავარაუდოდ თვის ბოლომდე გაგრძელდება, რის შედეგადაც პეკინის ქუჩა ახალ სახეს მიიღებს.
კუბლაშვილის განცხადებით, პეკინის ქუჩაზე ცალმხრივად მოძრაობის გამო, სატრანსპორტო მოძრაობის გეგმა გარკვეულწილად შეიცვლება. გაგარინის მოედნიდან ტრანსპორტი ბესიკის ქუჩით ყაზბეგის გამზირზე მოხვდება, საიდანაც შემდეგ პეკინზე იმოძრავებენ.
"ავტობუსები და სამარშრუტო ტაქსები პეკინის ქუჩაზე ორმხრივად იმოძრავებენ. ავტობუსებისთვის "ბასლეინს" უკვე ვაწყობთ. ასე, რომ მუნიციპალური ტრანსპორტი ამ ქუჩაზე ორმხრივად იმოძრავებს. მუნიციპალური ტრანსპორტისთვის კოსტავა-შარტავას ქუჩებზეც ასევე, ორმხრივი მოძრაობა იქნება. პეკინის ქუჩაზე ცალმხრივი მოძრაობასთან დაკავშირებით მოსახლეობასთან ჩვენ ძალიან დიდი სამუშო გავწიეთ და გამოკითხვები გვქონდა, რათა მათი აზრი გათვალისწინებული ყოფილიყო. სატრანსპორტო ნაკადებზე დაკვირვება მომავალშიც გაგრძელდება", - განაცხადა გივი კუბლაშვილმა.
კეთილმოწყობის საქალაქო სამსახურის უფროსის თქმით, რეაბილიტირებულ პეკინის ქუჩაზე ველობილიკებიც იქნება და მოქალაქეებს შეეძლებათ ველოსიპედებით ქუჩაზე 18 სექტემბრიდან გადაადგილდნენ. ამ მიზნით პეკინის ქუჩაზე ტროტუარი 3 მეტრით გაფართოვდა და ერთი კილომეტრის მანძილზე ორმხრივი ველობილიკი იქნება.
"ქუჩებზე ველობილიკების მოწყობას სხვა ქუჩებზეც გავაგრძელებთ. კერძოდ, ვაჟა-ფშაველას გამზირზე ველობილიკებისთვის გზის სავალი ნაწილი დაიხაზება და ზოლი მოეწყობა", - განაცხადა კეთილმოწყობის საქალაქო სამსახურის უფროსმა.
შეგახსენებთ, პეკინის ქუჩაზე სარეაბილიტაციო სამუშაოები სამი თვეა მიმდინარეობს.