მოსახლეობა სოფო ბერიძის სიკვდილში დამნაშავე პირის დასჯას მოითხოვს
სოციალურ ქსელში, 24 იანვარს რუსთაველის გამზირზე ავარიული მდგომარეობის გამომწვევი პირის დასჯის მოთხოვნით აქცია უკვე დაიგეგმა. დემონსტრაცია სახელწოდებით "დაისაჯოს სოფო ბერიძის მკვლელი გიორგი (გიბო) ჯაფარიძე" საქართველოს პროკურატურასთან 28 იანვარს, 5 საათისთვის არის ჩანიშნული. მოსახლეობა პროკურატურასთან ტრანსფარანტებით მისვლას გეგმავს.
შსს სოფო ბერიძის საქმესთან დაკავშირებით განცხადებას ავრცელებს
24 იანვარს ღამით, თავისუფლების მოედანთან ერთმანეთს სამი ავტომობილი შეეჯახა. დაიღუპა 26 წლის გოგონა, რომელიც შემთხვევის დროს ტაქსით გადაადგილდებოდა. თვითმხილველთა თქმით, ავარია "მერსედესის" მარკის ჯიპის მძღოლის მიზეზით მოხდა, რომელიც მანქანას გადაჭარბებული სიჩქარით მართავდა. ძიება სისხლის სამართლის კოდექსის 276-ე მუხლის მეხუთე ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც გამოიწვია ადამიანის სიცოცხლის მოსპობა და ისჯება თავისუფლების აღკვეთით, ვადით ოთხიდან შვიდ წლამდე.