პირველი ადამიანი ისტორიაში, რომელმაც 200 მილიარდი დაკარგა - რა ქონებას ფლობს ახლა ილონ მასკი?
ილონ მასკი, ჯეფ ბეზოსის შემდეგ, მსოფლიოში რიგით მეორე ადამიანია, რომელსაც ოდესმე 200-მილიარდ დოლარზე მეტი ქონება დაუგროვებია. მასკის ქონებამ პიკს 2021 წლის 4 ნოემბერს მიაღწია, როცა ის 340-მილიარდ დოლარამდე ავიდა, შედეგად კი ის მსოფლიოს უმდიდრესი ადამიანი გახდა.
"ტესლას" დირექტორი დიდხანს ინარჩუნებდა ამ სტატუსს, თუმცა გასული წლის მიწურულს მას ფრანგმა მაგნატმა, ბერნარ არნომ გადაუსწრო.
მასკისთვის 2022 წელი არც ისე სახარბიელო იყო - ის გახდა ერთადერთი ადამიანი ისტორიაში, რომელმაც 200 მილიარდი დაკარგა. 51 წლის მასკის ქონება 137-მილიარდ დოლარამდე შემცირდა მას შემდეგ, რაც "ტესლას" აქციების ფასი ბოლო კვირებში საგრძნობლად დაეცა. Bloomberg-ის მილიარდერების ინდექსის მიხედვით, აქციების ფასი 65%-ით დაეცა.
Tesla-ს აქციების მფლობელთა ზეწოლის გაძლიერების ფონზე, მასკი "ტვიტერზე" არსებული პრობლემებითაცაა დაკავებული. მან პლატფორმაზე დასაქმებული თანამშრომლების ნახევარი გაათავისუფლა.
მასკმა უარყო Tesla-ს შესახებ შემაშფოთებელი ინფორმაციები და ფედერალური სარეზერვო სისტემა საპროცენტო განაკვეთების გაზრდის გამო არაერთხელ გააკრიტიკა. "Tesla ახლა ბევრად უკეთ მუშაობს, ვიდრე ოდესმე. ფედერალურ რეზერვს ჩვენ არ ვაკონტროლებთ. რეალური პრობლემა სწორედ ისაა", - დაწერა მასკმა "ტვიტერზე."