18.08.2017 / 15:43
შრიფტის ზომა:

სურსათის ეროვნულმა სააგენტომ თელავის ბაზარში კრიტიკული შეუსაბამობები გამოავლინა

სურსათის ეროვნულმა სააგენტომ თელავის ბაზარში კრიტიკული შეუსაბამობები გამოავლინა. როგორც "ინტერპრესნიუსს" სურსათის ეროვნულ სააგენტოში განუცხადეს, იმ სექციებში, სადაც კრიტიკული შეუსაბამობები დაფიქსირდა, საწარმო პროცესი შეჩერდა, მათ მიეცათ მითითებები და საწარმოო პროცესის აღდგენა მითითებების შესრულების შემდეგ მოხდება.

"სურსათის ეროვნულმა სააგენტომ თელავის ბაზარი არაერთხელ შეამოწმა. ბოლო შემოწმებისას აღინიშნა დარღვევები, კრიტიკული შეუსაბამობა - ტემპერატურული რეჟიმის დარღვევა, მაცივრის გაუმართაობა, ასევე სანიტარულ-ჰიგიენური ნორმების დარღვევა, შესაბამისად, სააგენტომ განახორციელა შესაბამისი ღონისძიებები. მიმდინარეობს ზედამხედველობა, რომ მოხდეს სააგენტოს მიერ გაცემული მითითებების შესრულება. იმ ადგილას, სადაც დაფიქსირდა კრიტიკული შეუსაბამობა, იმ ბიზნეს ოპერატორს უჩერდება საწარმოო პროცესი", - განუცხადეს "ინტერპრესნიუსს" სურსათის ეროვნულ სააგენტოში.