სიერა-ლეონეში მღვდელმა 706 - კარატიანი ბრილიანტი იპოვა
სიერა-ლეონეში უზარმაზარი, 706 - კარატიანი ბრილიანტი იპოვეს, რომელსაც აფრიკული სახელმწიფოსთვის მილიონობით დოლარის მოტანა შეუძლია.
ბრილიანტი ადგილობრივმა მღვდელმა, ემანუელ მომომ იპოვა და ძვირფასი ქვა დაუყოვნებლივ ხელისუფლებას გადასცა.
ქვეყნის პრეზიდენტმა, ერნესტ ბაი კორომამ, მღვდელს, რომელიც ამავდროულად მაღაროელად მუშაობს, კეთილსინდისიერებისთვის მადლობა გადაუხადა და ბრილიანტის გაყიდვის შემდეგ, ანაზღაურებას დაჰპირდა.
706-კარატიანი ბრილიანტი ერთ-ერთი ყველაზე დიდია, რომელიც უკანასკნელი წლების განმავლობაში უპოვიათ. რეკორსმენი 2015 წელს ნაპოვნი 1111-კარატიანი ბრილიანტია.
ყველაზე დიდი ბრილიანტი, რომელიც ისტორიას ახსოვს 1906 წელს, სამხრეთ აფრიკაშია ნაპოვნი და მისი წონა 3 106-კარატს შეადგენს.
სიერა-ლეონედან ბრილიანტების ექსპორტის ნებართვა გაერომ 2003 წელს, სამოქალაქო ომის დასრულების შემდეგ გასცა, რომელიც სწორედ ამ ბრილიანტების გამო დაიწყო.
"სისხლიანი ბრილიანტებისთვის" ბრძოლას მაშინ 50 ათასი ადამიანის სიცოცხლე ემსხვერპლა.