10.08.2017 / 13:21
შრიფტის ზომა:

ანჯელინა ჯოლიმ და ბრედ პიტმა განქორწინების პროცესი შეაჩერეს

ამერიკელმა მსახიობებმა ბრედ პიტმა და ანჯელინა ჯოლიმ, რომლებმაც განქორწინებაზე საბუთები თითქმის ერთი წლის წინ შეიტანეს, შესაძლოა, ურთიერთობა აღადგინონ. ამის შესახებ ჟურნალი US Weekly წყვილთან დაახლოებულ წყაროებზე დაყრდნობით წერს.

"განქორწინება შეჩერდა. უკანასკნელი რამდენიმე თვის განმავლობაში მათ პროცესის წინ წაწევისთვის არაფერი გაუკეთებიათ, და ყველას ჰგონია, რომ ბრედი და ანჯელინა ამას არც აპირებენ" - განაცხადა ჟურნალის წყარომ.

მაისში US Weekly უკვე წერდა, რომ პიტი და ჯოლი ბავშვებისგან მალულად ერთმანეთს ხვდებიან. მაშინ იწერებოდა, რომ ურთიერთობების დათბობაზე დადებითად ბრედ პიტის სასმელზე უარის თქმამ იმოქმედა. მათი მეგობრების თქმით, განქორწინების პროცესის შეჩერება შესაძლოა ნიშნავს იმას, რომ წყვილი მომდევნო ნაბიჯის გადადგმასაც აპირებს.

"ყველა ფიქრობს, რომ მათ შეიძლება ისევ ერთად ცხოვრება დაიწყონ. არ გამიკვირდება, თუ ისინი განქორწინებას გააუქმებენ და ყველაფრის მოგვარებას შეეცდებიან" - განუცხადა ჟურნალს პიტის და ჯოლის ერთ-ერთმა საერთო ნაცნობმა.

ანჯელინა ჯოლიმ პიტთან დაშორების შესახებ 2016 წლის სექტემბერში განაცხადა. მსახიობმა საკუთარი გადაწყვეტილება "მეუღლეებს შორის მოუგვარებელი უთანხმოებებით" ახსნა. მან ასევე სთხოვა სასამართლოს, რომ წყვილის ექვსივე შვილი მასთან დარჩეს. მოგვიანებით ცნობილი გახდა, რომ მეუღლეები ბავშვებზე მეურვეობის შესახებ შეთანხმდნენ.