მომავალ წელს მასწავლებლებს ხელფასი კიდევ 150 ლარით გაეზრდებათ - განათლების მინისტრი | Allnews.Ge

მომავალ წელს მასწავლებლებს ხელფასი კიდევ 150 ლარით გაეზრდებათ - განათლების მინისტრი

განათლების, მეცნიერების, კულტურისა და სპორტის სამინისტროს ბიუჯეტი მომავალ წელს 130 მილიონი ლარით გაიზრდება. როგორც მინისტრმა მიხეილ ბატიაშვილმა მთავრობის რიგგარეშე სხდომაზე, სახელმწიფო ბიუჯეტი მიმართული იქნება განათლების ყველა საფეხურის გაძლიერებაზე, დაწყებული სკოლამდელი განათლებით დასრულებული მეცნიერებით.

„მოგეხსენებათ მიმდინარეობს განათლების კომპლექსური რეფორმა, რომელიც მოიცავს განათლების სფეროს ყველა მიმართულებას - სკოლამდელი განათლებით დაწყებული, მეცნიერებით დამთავრებული. შესაბამისად, ახალი ბიუჯეტით დაგეგმილია რეფორმის ეფექტურად განხორციელება. პირველ რიგში გამოვყოფდი სკოლის მიმართულებით სამ ძირითად ასპექტს: პირველი, ეს არის სკოლის ინფრასტრუქტურა, სადაც ინფრასტრუქტურის სამინისტროსთან ერთად დაგეგმილია, როგორც ახალი სკოლების მშენებლობა, ასევე არსებული სკოლების რეაბილიტაცია; სარეაბილიტაციო პროექტების მასშტაბი წელს კიდევ უფრო გაიზრდება და უფრო მეტ სკოლას მოვიცავთ. მეორე უმნიშვნელოვანესი საკითხი - ეს არის სახელმძღვანელოები, რომლის ხარისხის გაუმჯობესება უკვე დავიწყეთ, ამ მიმართულებით მუშაობა გაგრძელდება და კიდევ უფრო მაღალი ხარისხის სახელმძღვანელოებს მივიღებთ, რითიც ისარგებლებენ ჩვენი მოსწავლეები - და მესამე, ერთ-ერთი უმნიშვნელოვანესი, ეს არის მასწავლებლები. მოგეხსენებათ, რეფორმის ფარგლებში, შემოდგომაზე მასწავლებელთა ანაზღაურება იზრდება 150 ლარით და როგორც დავპირდით ჩვენს პედაგოგებს, მთავრობის გადაწყვეტილებით, მომავალი წლის ბიუჯეტში ხელფასების კიდევ დამატებით 150 ლარით ზრდა გათვალისწინებულია. ეს ნიშნავს იმას, რომ დღევანდელთან შედარებით, პედაგოგის ხელფასი ჯამში 300 ლარით გაიზრდება. ეს არის უმნიშვნელოვანესი ზრდა და დაკავშირებულია პირდაპირ პედაგოგების კვალიფიკაციის ამაღლებასთან. ყოველწლიურად ეს პროცესი გაგრძელდება და გვეყოლება პედაგოგები, რომლებიც ნამდვილად ღირსეულ ანაზღაურებას მიიღებენ.

მნიშვნელოვანი ინფრასტრუქტურული პროექტები გვაქვს დაგეგმილი პროფესიული განათლების მიმართულებით, კერძოდ, მომავალ წელს დაგეგმილია 6 ახალი პროფესიული სასწავლებლების აშენდება, რაც გაზრდის რეგიონულ დაფარვას და ხელმისაწვდომობას.

მომავალი წლის ბიუჯეტში გათვალისწინებულია ხელფასების ზრდა პროფესიული სასწავლებლების პედაგოგებისთვისაც. ახლანდელ მონაცემს რომ შევადაროთ, დაახლოებით 50 %-ით გაიზრდება მათი ხელფასები. რაც ვფიქრობთ, რომ ძალიან მნიშვნელოვანი ნაბიჯია“, - განაცხადა მიხეილ ბატიაშვილმა.

მინისტრმა უმაღლესი განათლების მიღწევებზე ისაუბრა და აღნიშნა, რომ დაფინანსება მიმართული იქნება სწორედ იქითკენ, რომ გაიზარდოს უმაღლესი განათლების ხარისხი და, ასევე, ინფრასტრუქტურული შესაძლებლობები.

„წელს სიახლეები გვქონდა უმაღლესი განათლებისა და მეცნიერების მიმართულებით, ის ევროპული სივრცის ნაწილი გახდა. ეს გულისხმობს ევროპულ სივრცეში მეტ ინტეგრაციას, ხარისხის ზრდას. შესაბამისად, უმაღლესი განათლების დაფინანსება მიმართული იქნება სწორედ იქითკენ, რომ გაიზარდოს ხარისხი და, ასევე, ინფრასტრუქტურული შესაძლებლობები. ჩვენს მეცნიერებს გაეხსნათ ევროპული სივრცე, რაც მილიონობით დოლართან წვდომას ნიშნავს. ჩვენი რესურსებითაც მაქსიმალურად დავეხმარებით მათ.

განათლება რომ მთავრობის ერთ-ერთი უმნიშვნელოვანესი პრიორიტეტია, ეს ბიუჯეტის ზრდაშიც გამოიხატა. გათვალიწინებულია განათლების ბიუჯეტის 130 მილიონზე მეტით გაზრდა, რაც მოგვცემს იმის შესაძლებლობას, რომ კომპლექსური რეფორმა წარმატებით განხორციელდეს. აღსანიშნავია კიდევ ერთი მნიშვნელოვანი ფაქტი - ერთი წლის აქტიური მუშაობის შედეგად განათლების სამინისტრომ საერთაშორისო ორგანიზაციებიდან 600 მილიონი ლარი მოიზიდა. მისი ათვისება მომავალი წლიდან დაიწყება. საერთაშორისო ორგანიზაციებთან თანამშრომლობა კიდევ გაგრძელდება, მოლაპარაკება კიდევ მიმდინარეობს რამდენიმესთან. ეს რესურსები არსებულ ბიუჯეტთან ერთად განათლების რეფორმას მოხმარდება“, - განაცხადა მინისტრმა.

myquiz