აქტივისტებმა ერევნის პოლიციის განყოფილებასთან პოლიციის ორი ავტომობილი დაწვეს
ერევანში, პოლიციის განყოფილების შენობაში გამაგრებული შეიარაღებული ჯგუფის მხარდამჭერებმა მასობრივი აქცია გამართეს.
როგორც მედია იტყობინება, რამდენიმე ათასი ადამიანი შენობის მიმდებარედ შეიკრიბა და ერევნის ცენტრალურ ქუჩებში საპროტესტო მსვლელობა მოაწყო.
ერევნის პოლიციის ცნობით, აქციის დროს აქტივისტებმა პოლიციის განყოფილების შენობასთან მდგომი პოლიციის ორი ავტომობილი დაწვეს.
შეიარაღებული ჯგუფი ერევანში მდებარე ერთ-ერთ პოლიციის განყოფილების შენობაში 17 ივლისს შეიჭრა. შტურმისას დაიღუპა ერთი სამართალდამცველი და 4 დაშავდა. თავდამსხმელები სომხეთის პრეზიდენტისა და მთავრობის გადადგომას, ასევე ოპოზიციონერი ლიდერის, ჟირაირ სეფილიანის გათავისუფლებას ითხოვენ.