მოხუცთა თავშესაფარში გაჩენილ ხანძარს 17 ადამიანი ემსხვერპლა
უკრაინის დედაქალაქ კიევთან ახლოს მდებარე სოფელში მოხუცთა თავშესაფარში გაჩენილ ხანძარს 17 ადამიანის სიცოცხლე ემსხვერპლა.
"ბი-ბი-სი"-ს ინფორმაციით, ორსართულიან თავშესაფარს 35 ბენეფიციარი ჰყავდა.
ადგილზე მობილიზებულმა სამაშველო და სახანძრო სამსახურის თანამშრომლებმა 18 ადამიანის გადარჩენა შეძლეს.
უკრაინის საგანგებო სიტუაციების მინისტრის განცხადებით, 5 ადამიანი ადგილობრივ საავადმყოფოში მძიმე დაზიანებებით გადაიყვანეს.
მომხდართან დაკავშირებით გამოძიება მიმდინარეობს. ხანძრის გამომწვევი მიზეზი ამ დრომდე უცნობია. თუმცა ვარაუდობენ, რომ ხანძარი ტელევიზორის აფეთქებამ გამოიწვია. უკრაინის პრემიერ -მინისტრმა ვლადიმირ გროისმანმა მომხდარს მძიმე დანაკარგი უწოდა და გარდაცვლილთა ოჯახის წევრებს მიუსამძიმრა.