"სამეფო კარის თამაშებმა" "ემის" ჯილდოს რეკორდული რაოდენობა მოიპოვა
ამერიკულმა სატელევიზიო სერიალმა "სამეფო კარის თამაშები" "ემის" ჯილდოს რეკორდული რაოდენობა მოიპოვა. ტელესერიალმა ლოს-ანჯელესში გამართულ დაჯილდოვებაზე სხვადასხვა ნომინაციაში "ემის" 12 პრემია მიიღო.
ამერიკის შეერთებული შტატების სატელევიზიო ხელოვნების აკადემიამ "სამეფო კარის თამაშები" "საუკეთესო დრამატულ სერიალად" აღიარა. სერიალმა ჯილდო საუკეთესო სცენარსა და ცხრა ტექნიკურ ნომინაციაშიც მოიპოვა, შედეგად 38 "ემის" ფიგურა დააგროვა, რაც ამერიკული სატელევიზიო პრემიის ისტორიაში საუკეთესო შედეგია.
აკადემიის ჯილდო რეჟისორს, მიგელ საპოჩნიკსაც ერგო.
"საუკეთესო დრამატული სერიალის" ნომინაციაზე ასევე წარდგენილი იყო "ამერიკელები", "მისტერ რობოტი", "ბანქოს სახლი", "სამშობლო" და "დაუნტონის სააბატო".
სატელევიზიო ხელოვნების აკადემიამ "საუკეთესო კომედიურ სერიალად" "ვიცე-პრეზიდენტი" აღიარა, "საუკეთესო სატელევიზიო ფილმისთვის" "ემის" ჯილდო პოპულარული სერიალის "შერლოკი-საშინელი პატარძალი" მორიგმა ეპიზოდმა დაიმსახურა.
დრამატულ სერიალში მამაკაცის მთავარი როლის საუკეთესო შესრულებისთვის "მისტერ რობოტის" მთავარი გმირი რამი მალეკი დაჯილდოვდა. ამავე ნომინაციაში ქალის საუკეთესო როლის შემსრულებლად ტატიანა მასლანი დასახელდა სერიალიდან "იდუმალი ობოლი".
კომედიურ სერიალში მამაკაცის მთავარი როლის საუკეთესო შესრულებისთვის ჯეფრი ტამბორი დაჯილდოვდა სერიალიდან "აშკარა". ამავე ნომინაციაში ქალის საუკეთესო როლის შემსრულებლად ჯულია ლუი დრეიფუსი დასახელდა სერიალიდან "ვიცე პრეზიდენტი".
"ემის" პრემია 1949 წლიდან გაიცემა, დაჯილდოვება ყოველწლიურად იმართება და "ოსკარის" სატელევიზიო ექვივალენტად ითვლება.