გაზსა და ელექტროენერგიაზე, შესაძლოა, ტარიფები გაიზარდოს
ლარის გაუფასურების პარალელურად შესაძლოა გაზსა და ელექტროენერგიაზე სამომხმარებლო ტარიფები გაიზარდოს. როგორც ენერგეტიკის და წყალმომარაგების მარეგულირებელი ეროვნული კომისიის თავმჯდომარემ ირინა მილორავამ "რუსთავი2-თან" საუბრისას განაცხადა, ტარიფების გადახედვის მოთხოვნით გაზმომარაგებაზე მომუშავე კომპანიებმა სემეკს უკვე მიმართეს.
ირინა მილორავას თქმით, წლის ბოლომდე გახდება ცნობილი, გაიზრდება თუ არა ბუნებრივ აირზე სამომხმარებლო ტარიფი.
"სატარიფო განხილვა ეხება რამდენიმე კომპანიას. ეხება გაზის ტრანსპორტირების კომპანიას. კომპანია "ყაზტრანსგაზს", "საქორგაზს" და "სოკარჯორჯიაგაზს". შესაბამისად, როგორ იქნება საბოლოოდ სამომხმარებლო ტარიფი, დამოკიდებულია ამ კომპანიების ტარიფების დადგენაზე. პასუხი გვეცოდინება ამ წლის ბოლომდე,"-განაცხადა ირინა მილორავამ.
რაც შეეხება ელექტროენერგიის გადასახადს, ენერგეტიკის და წყალმომარაგების მარეგულირებელი ეროვნული კომისიის თავმჯდომარის თქმით, თუ კომპანიები განაცხადებენ, რომ მათი ხარჯები შეიცვალა, მაშინ მათ აქვთ უფლება, რომ მიმართონ სემეკს ტარიფების გადახედვასთან დაკავშირებით.