ხადას ხეობაში დაკარგული 4 წლის ბავშვის ცხედარი იპოვეს - მწყემსმა თავად აჩვენა მაშველებს ადგილი, სადაც ბავშვის ცხედარი ჰქონდა გადამალული
მაშველებმა ხადას ხეობაში დაკარგული 4 წლის ბავშვის ცხედარი იპოვეს. გავრცელებული ცნობით, ცხედარი დამარხული იყო.
ამასთან, ვრცელდება ინფორმაცია, რომ სავარაუდო დამნაშავემ, რომელიც მწყემსია, ჯერ ბავშვის მამა მოკლა, შემდეგ კი დედა ჩანჩქერიდან გადააგდო.
როგორც ვიცი, მწყემსმა თავად აჩვენა მაშველებს ის ადგილი, სადაც ბავშვის ცხედარი ჰქონდა გადამალული, მცირეწლოვანი სავარაუდოდ, თოფით არის მოკლული, - ამის შესახებ "ინტერპრესნიუსს" დუშეთის რაიონის მერმა, ნუგზარ სეხნიაშვილმა განუცხადა.
"ჩემი ინფორმაციით, სავარაუდო დამნაშავემ აჩვენა მაშველებს ის ადგილი, სადაც ბავშვი ჰყავდა გადამალული. ჩანჩქერის მიმდებარე ტერიტორიაზე იყო სავარაუდოდ. ამ დროისთვის ჩემი ინფორმაციით, მცირეწლოვანს თოფი აქვს ნასროლი. კონფლიქტი მოზარდის მშობელსა და მწყემსს შორის ურთიერთშელაპარაკების შემდეგ მოხდა და სავარაუდოდ, თოფი ესროლა. ეს არის ვერსია. მწყემსი დაკავებულია“, - განაცხადა სეხნიაშვილმა.
6 ივლისს მარნეულის მუნიციპალიტეტში მცხოვრები ამერიკელი ცოლ-ქმარი რაიან და ლორა სმიტები, 4 წლის ვაჟთან ერთად, დუშეთის რაიონში, ხადას ხეობაში გაუჩინარდნენ.
შესაბამისი სამსახურის წარმომადგენლებმა მათი ძებნა იმავე დღეს, შეტყობინების შესვლისთანავე, დაიწყეს.