რა არ ვიცით ზაალ უდუმაშვილზე | Allnews.Ge

რა არ ვიცით ზაალ უდუმაშვილზე

პროფესიით ზოოინჟინერი ზაალ უდუმაშვილი ტელეკომპანია "რუსთავი 2"-ში საინფორმაციო გამოშვების წამყვანად 2003 წლიდან მუშაობს და უკვე წლებია, "კურიერი" ჟურნალისტ დიანა ჯოჯუასთან ერთად მიჰყავს.

ზაალ უდუმაშვილს საკუთარი პროფესიით არასდროს უმუშავია. მისი თქმით, ტელევიზიაში მუშაობა მაშინ დაიწყო, როდესაც პირველ კურსზე იყო და მაშინვე მიხვდა, რომ ჟურნალისტიკა მისი საქმე იყო. ის თავდაპირველად, საზოგადოებრივ მაუწყებელში მუშაობდა, თუმცა, როგორც ერთ-ერთ ინტერვიუში აღნიშნავს, "კურიერი" მისთვის ყოველთვის ნომერ პირველი საინფორმაციო გამოშვება იყო.

2014 წელს ზაალ უდუმაშვილი ტელეკომპანია "რუსთავი 2"-ის გენერალური დირექტორის პირველ მოადგილედ დაინიშნა და ამ პოზიციას დღემდე იკავებს. 2015 წლის 11 ნოემბერს, "რუსთავი 2"-ის გენერალური დირექტორის მოვალეობის შემსრულებლის თანამდებობა დავით დვალმა და რევაზ საყევარიშვილმა შესთავაზეს. ამ პერიოდში, "რუსთავი 2"-ის საქმეზე სასამართლო დავა მიმდინარეობდა, თუმცა ჟურნალისტმა შეთავაზებაზე უარი განაცხადა, რადგან არალეგიტიმურად მიიჩნია.

ზაალ უდუმაშვილი საქართველოში ერთ-ერთ მაღალანაზღაურებად ტელეწამყვანად მიიჩნევა. მისი ხელფასის შესახებ კონკრეტული ინფორმაცია ცნობილი არ არის, რადგან კომერციულ საიდუმლოებას წარმოადგენს, თუმცა მედიის განმარტებით, უდუმაშვილი მაღალანაზღაურებადი ჟურნალისტების ათეულში წამყვან პოზიციას იკავებს. ჟურნალისტი საკუთარ თავსა და ოჯახზე მედიასთან არ საუბრობს, თუმცა რამდენადაც ცნობილია, ზაალ უდუმაშვილს 2 შვილი ჰყავს, მეუღლესთან კი გაშორებულია.

ტელეკომპანია "რუსთავი 2"-ის გენერალური დირექტორის მოადგილე ადასტურებს, რომ "ნაციონალური მოძრაობისგან" თბილისის მერის არჩევნებში მათი სახელით მონაწილეობის შეთავაზება მიიღო.

როგორც უდუმაშვილმა ჟურნალისტებს განუცხადა, შეთავაზებაზე გადაწყვეტილება ჯერ არ მიუღია და მოსაფიქრებლად დრო ითხოვა. უდუმაშვილი კიევში იმყოფებოდა, სადაც მისივე თქმით, პარტიის ლიდერებს, მათ შორის მიხეილ სააკაშვილს შეხვდა.

myquiz