თამბაქო კიდევ გაძვირდა | Allnews.Ge

თამბაქო კიდევ გაძვირდა

ჯიხურებში ზოგიერთი დასახელების სიგარეტი კიდევ 20 თეთრით გაძვირდა. როგორც თამბაქოს სარეალიზაციო ჯიხურებში "ბიზნესპრესნიუსს" განუცხადეს, სიგარეტის ფასმა ბოლო ერთი კვირის განმავლობაში მოიმატა.

მაგალითად, ერთი კოლოფი "პარლამენტი" და "სობრანიე" 4.50 ლარიდან 4.70 ლარამდე გაძვირდა. 20 თეთრით გაძვირდა ერთი კოლოფი "ქემელის" მარკის სიგარეტი და დღეს მისი ფასი 4 ლარია. "ფილიპ მორისისა" და "ემემის" ფასი კი 3.20 ლარი გახდა.

ჯიხურებში ვერ აკონკრეტებენ მიზეზს, თუ რატომ მოიმატა სიგარეტის ფასმა და მხოლოდ იმას აღნიშნავენ, რომ პროდუქცია მათ უკვე გაძვირებული ფასით მიიღეს.

ცნობისთვის, სიგარეტზე ფასის მატება ჯერ კიდევ გასული წლის დეკემბრიდან დაიწყო. მას შემდეგ თამბაქოს ფასი რამდენჯერმე შეიცვალა. იმ დროს ფასის მატების მიზეზად ლარი-დოლარის გაცვლითი კურსი და "საგადასახადო კოდექსში" აქციზის ზრდასთან დაკავშირებული ცვლილებები სახელდებოდა.

"ბიზნესპრესნიუსი" დაინტერესდა, რა გახდა ამ ეტაპზე სიგარეტის კიდევ ერთხელ გაძვირების მიზეზი, მით უფრო იმ ფონზე, როცა ეროვნული ვალუტა სტაბილურობას ინარჩუნებს, ხოლო აქციზის ზრდით გამოწვეული გავლენა ფასზე წესით უკვე სრულად უნდა იყოს ასახული.

როგორც "ფილიპ მორისში" "ბიზნესპრესნიუსს" განუცხადეს, ფასის მატება ჩვეულებრივი ბიზნესპროცესია და ეს შედეგი ყველა კომპონენტის გათვალისწინებამ გამოიწვია.

"ფასის მატება ყველა კომპონენტის გათვალისწინებით მოხდა. ამ კომპონენტებს დეტალურად ვერ აღვწერ, მაგრამ ბაზარი როგორც მიდის, ისე მიჰყვება ინდუსტრიაც,"-აღნიშნეს კომპანიაში.

myquiz