თბილისში ახალგაზრდა ქალმა ბენზინის აალების შედეგად მე-3 ხარისხის დამწვრობა მიიღო
თბილისში ახალგაზრდა ქალმა, ბენზინის აალების შედეგად მე-3 ხარისხის დამწვრობა მიიღო. როგორც ხეჩინაშვილის სახელობის საუნივერსიტეტო კლინიკის დამწვრობის ცენტრის ხელმძღვანელმა გუგა ქაშიბაძემ განაცხადა, მისთვის უცნობია სად მიიღო დაახლოებით 24-26 წლის ახალგაზრდა ქალმა დამწვრობა, რომელიც ბენზინის აალების შედეგად მოხდა.
"სახეზეა ბენზინის აალების კვალი. უცნობია, იყო თუ არა ეს სუიციდის მცდელობა. ბენზინის აალების შედეგად სხეულის 20%-ია დამწვარი, მე-2-მე-3 ხარისხის დამწვრობა აქვს მიღებული. პაციენტი ხეჩინაშვილის სახელობის საუნივერსიტეტო კლინიკის დამწვრობის ცენტრის რეანიმაციულ განყოფილებაშია. იგი კონტაქტურია და მზადდება ოპერაციისთვის", - განაცხადა ქაშიბაძემ.
მისივე თქმით, პაციენტს დამწვრობა თავზე, კისერზე, წინამხრებსა და მტევნებზე აღენიშნება. სავარაუდოდ დაზიანებულია სასუნთქი გზებიც.
ამასთან, როგორც შინაგან საქმეთა სამინისტროში განაცხადეს, ფაქტზე გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
გავრცელებული ინფორმაციით კი, ახალგაზრდა ქალმა ბენზინი გადაისხა და თავის დაწვა სცადა.