ცვლილებები, რომლებიც 2017 წელს განათლების სისტემაში განხორციელდება
2017 წლისთვის ზოგადი და უმაღლესი განათლების შესახებ კანონებში შესული ცვლილებები განხორციელდება. საუბარია მეცხრე მოწვევის პარლამენტის მიერ, განათლებისა და მეცნიერების კომიტეტის ინიციატივით მომზადებულ საკანონმდებლო ცვლილებებზე, რომელიც დეკემბერში დაჩქარებული წესით განიხილეს და მიიღეს.
ერთ-ერთ ნოვაციას დისტანციური სწავლების ინსტრუმენტის დანერგვა წარმოადგენს. როგორც ამასთან დაკავშირებით განათლებისა და მეცნიერების კომიტეტის თავმჯდომარე მარიამ ჯაშმა განაცხადა, ეს მნიშვნელოვანი სიახლეა დიასპორების წარმომადგენლებისთვის, ეთნიკური უმცირესობებისა და სოფლად მცხოვრები მოსახლეობისთვის, რისთვისაც შესაბამისი საკანონმდებლო ბაზა უკვე შექმნილია.
2017 წლიდან უნივერსიტეტებს შეეძლება პროფესორები დანიშნონ არა მხოლოდ უვადო ხელშეკრულებით, არამედ მოხდეს დიფერენციაცია - უვადო და ვადიან დანიშვნებთან დაკავშირებით.
გარდა ამისა, 2017 წლიდან საზღვარგარეთ აღიარებული ზოგადი განათლების დიპლომების გამარტივებული წესით აღიარება მოხდება.
"ამასთან დაკავშირებით შემდგომი ნაბიჯები განათლების სამინისტროს პრეროგატივაა, რომ კონკრეტული ხელშეკრულების გაფორმების შემდგომ საერთაშორისო სკოლებს გამარტივებული წესი განესაზღვროს, რომ თუკი ბავშვი აშშ-ს, ევროკავშირის ან საერთაშორისოდ აღიარებული ზოგადი განათლების საგამოცდო სისტემებს ჩააბარებს, მას აღარ ჰქონდეს საატესტატო გამოცდების ჩაბარების ვალდებულება და დაშვებულ იქნას ერთიან ეროვნულ გამოცდებზე", - განაცხადა მარიამ ჯაშმა.
ალექსანდრე ჯეჯელავა განათლების სფეროში დაგეგმილ ცვილებებზე საუბრობს
მისივე თქმით, გამარტივდა წლების მანძილზე გადაუჭრელი ადმინისტრაციული პრობლემა უნივერსიტეტების დონეზე - უძრავი და მოძრავი ქონების მართვასთან დაკავშირებული საკითხები, რომელიც ეკონომიკის და განათლების სამინისტროებთან უნდა შეთანხმებულიყო. ჯაშის განცხადებით, ამ კუთხით უნივერსიტეტებისათვის მოქმედება გამარტივდება.