სოზარ სუბარი - ჩაბუქი მოთავსდება ევროპული სტანდარტების სასჯელაღსრულების დაწესებულებაში, არ დაექვემდებარება არანაირ წამებას
ევროპული სტანდარტების სასჯელაღსრულების დაწესებულებაში, თუკი მისი ექტრადიცია მოხდება ლტოლვილის სტატუსის მინიჭება აჩერებს ექსტრადირებას, მაგრამ სტატუსზე უარის თქმა არ ნიშნავს ექსტრადირებას, - ამის შესახებ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა ტელეკომპანია "იმედის" ეთერში დემირელის კოლეჯის მენეჯერის მუსტაფა ემრე ჩაბუქის საქმეზე საუბრისას განაცხადა.
მანვე ისაუბრა იმ დიპლომატიურ გარანტიებზე, რომელიც პროკურატურამ მიიღო.
"საქართველოს სახელმწიფომ, ამ შემთხვევაში პროკურატურამ მიიღო დიპლომატიური გარანტიები.
არა ზოგადი დიპლომატიური გარანტიები, არამედ კონკრეტულად ჩაბუქთან დაკავშირებით, რომ ის მოთავსდება ევროპული სტანდარტების მქონე სასჯელაღსრულების დაწესებულებაში, არ დაექვემდებარება არანაირ წამებასა და ღირსების შემლახავ მოპყრობას, საქართველოს საკონსულოს წარმომადგენლებს ნებისმიერ დროს ექნებათ საშუალება ეს ადამიანი ინახულონ და შეამოწმონ მისი მდგომარეობა. ეს იმ შემთხვევაში, თუკი მისი ექტრადიცია მოხდება", - განაცხადა სუბარმა.
მისივე თქმით, თურქეთის მხარემ უნდა გაუგზავნოს შესაბამისი მასალები პროკურატურას, იუსტიციის სამინისტროს და იქ მსჯელობის შემდეგ განიხილება ექსტრადიციის თემა.
"ჩვენ უნდა ვიფიქროთ, რომ თუ კონკრეტულ ადამიანზე არის პოლიტიკური დევნა, ის იმსახურებს პოლიტიკურ თავშესაფარს, ან მეორე - თუ სამართლიანი სასამართლოს უფლება იქნება დარღვეული, ან წამების საფრთხის ქვეშ დგას, ბუნებრივია, ის გადაცემას ვერ დაექვემდებარება, თუნდაც მისი დანაშაული იყოს ცხადი. ეს არის თურქეთის მხარის დასამტკიცებელი, რომელმაც უნდა გაუგზავნოს შესაბამისი მასალები პროკურატურას, იუსტიციის სამინისტროს და იქ მსჯელობის შემდეგ განიხილება ექსტრადიციის თემა", - განაცხადა სუბარმა.
ჩაბუქის ადვოკატის სოსო ბარათაშვილის ინფორმაციით, დემირელის კოლეჯის მენეჯერს, მუსტაფა ემრე ჩაბუქს და მისი ოჯახის წევრებს ლტოლვილის სტატუსის მინიჭებაზე უარი ეთქვათ.
მუსტაფა ემრე ჩაბუქი ტერორისტულ ორგანიზაციასთან თანამშრომლობის ბრალდებით 24 მაისს დააკავეს. თბილისის საქალაქო სასამართლომ მუსტაფა ემრე ჩაბუქს 3-თვიანი წინასაექსტრადიციო პატიმრობა 25 მაისს შეუფარდა.