დავით ნარმანია - დარწმუნებული ვარ, კახა კალაძე ძალიან კარგი მერი იქნება | Allnews.Ge

დავით ნარმანია - დარწმუნებული ვარ, კახა კალაძე ძალიან კარგი მერი იქნება

დარწმუნებული ვარ, კახა კალაძე ძალიან კარგი მერი იქნება, - ამის შესახებ თბილისის მერმა დავით ნარმანიამ გაზეთ "კვირის პალიტრისთვის" მიცემულ ექსკლუზიურ ინტერვიუში განაცხადა.

"კახა კალაძე ჩემი მეგობარია, არჩევნებისას ის გვერდში მედგა და თუ გუნდი მას დაასახელებს მერობის კანდიდატად, მეც მხარში ამოვუდგები. დარწმუნებული ვარ, კახა კალაძე ძალიან კარგი მერი იქნება", - განაცხადა ნარმანიამ.

კითხვაზე, კალაძის დასახელება იქნება თუ არა მისთვის გზავნილი, რომ გუნდი არც ისე წარმატებულ მერად მიიჩნევს, დავით ნარმანიას განცხადებით, მისი წარმატების ხარისხი საზოგადოებამ უნდა განსაზღვროს.

"ჩემი წარმატების ხარისხი საზოგადოებამ უნდა განსაზღვროს, მით უმეტეს, იმ უამრავი პროექტის შემდეგ, რაც გავაკეთე - ახალი ავტობუსები, აღმაშენებლის გამზირი, პუშკინის ქუჩაზე ორმხრივი მოძრაობის აღდგენა, შინდისი-კრწანისისა და სამება-მახათის გზა, ათზე მეტი ახალი საბავშვო ბაღი, პეკინის პროსპექტის სრული აღდგენის გეგმა და ა.შ.", - განაცხადა ნარმანიამ.

რაც შეეხება გენერალური აუდიტორის თანამდებობაზე მისი კანდიდატურის განხილვას, დავით ნარმანიას განცხადებით, კონსულტაცია ბევრ საკითხზე მიმდინარეობს.

"გუნდის საერთო გადაწყვეტილებით გაირკვევა, მე ვიქნები მერობის კანდიდატი თუ სხვა, ან სად გადავინაცვლებ, თუ მერობის კანდიდატი აღარ ვიქნები", - განაცხადა ნარმანიამ.

myquiz