კახა კალაძე მის მიმართ წამოყენებულ ბრალდებებს პასუხობს | Allnews.Ge

კახა კალაძე მის მიმართ წამოყენებულ ბრალდებებს პასუხობს

ბოლო კვირების განმავლობაში ვისმენთ დესტრუქციული ძალების მხრიდან ცილისმწამებლურ განცხადებებს და ისინი ყველანაირად ცდილობენ თავიანთი დეზინფორმაციით მოსახლეობა შეიყვანონ შეცდომაში, - ამის შესახებ ენერგეტიკის მინისტრმა კახა კალაძემ დღეს გამართულ პრესკონფერენციაზე განაცხადა, სადაც ქსანი-სტეფანწმინდის მაღალი ელექტროგადამცემი ხაზების მშენებლობასთან დაკავშირებით მიმდინარე მოვლენებს გამოეხმაურა.

როგორც კალაძემ აღნიშნა, ელექტროგადამცემი ხაზები მშენებლობას ეწინააღმდეგებიან ის ადამიანები, ვინც არამხოლოდ ელექტროგადამცემი ხაზების მშენებლობას, არამედ ზოგადად ქვეყანაში ყველა ენერგეტიკული პროექტის განხორციელებას ეწინააღმდეგება.

"საქართველოს მთავრობამ ენერგეტიკის სამინისტროს ინიციატივით მიიღო ქვეყნის ენერგეტიკული განვითარების 10-წლიანი გეგმა, რომელიც ითვალისწინებს ელექტროგადამცემი ხაზების, ქვესადგურების მშენებლობა-რეაბილიტაციას. ამ გეგმის ნაწილია ქსანი-სტეფანწმინდის მაღალი ელექტროგადამცემი ხაზები. ამ კონკრეტულ პროექტთან დაკავშირებით გარკვეული დესტრუქციული ძალები ეწინააღმდეგებიან არამხოლოდ ელექტროგადამცემი ხაზების მშენებლობას ზოგადად, არამედ ქვეყანაში ყველა ენერგეტიკული პროექტის განხორციელებას.

ესენი არიან ადამიანები, რომლებიც ეწინააღმდეგებიან ქვეყნის განვითარებას, ეკონომიკურ, ენერგეტიკულ განვითარებას.

ჩვენ ბოლო კვირების განმავლობაში ვისმენთ ამ ადამიანების მხრიდან ცილისმწამებლურ განცხადებებს და ისინი ყველანაირად ცდილობენ, თავიანთი დეზინფორმაციით ადგილობრივი მოსახლეობა და ჩვენი ქვეყნის მოქალაქეები შეიყვანონ შეცდომაში. ვისმენთ განცხადებებს, თითქოს ეს ხაზები საშიშია ჯანმრთელობისთვის, იწვევს მეწყერს, ვაზიანებთ გარემოს, ვაუბედურებთ ოჯახებს და ა.შ. ეს არ იკმარეს და ბოლო ორი დღის განმავლობაში გვაბრალებენ ბარბაროსულ და ვანდალურ ქმედებებს, თითქოს ჩვენ მოვთხარეთ საფლავები და მიცვალებულებს შეურაცხყოფა მივაყენეთ. ეს ძალიან დიდი ტყუილი და სიცრუეა", - განაცხადა კახა კალაძემ.

კითხვაზე, თუ ვის გულისხმობს ენერგეტიკის მინისტრი დესტრუქციულ ძალებში, კახა კალაძემ აღნიშნა, რომ ამ ძალებში გულისხმობს იმ არასამთავრობო ორგანიზაციებს, რომლებიც მაქსიმალურად ცდილობენ ადგილობრივი მოსახლეობის შეცდომაში შეყვანას.

"ესენი არიან კონკრეტული ადამიანები, რომლებიც შვილმკვდარი დედის ტრაგედიას იყენებენ თავიანთი ბოროტი ზრახვების განსახორციელებლად", - განაცხადა კალაძემ და დასძინა, რომ ეს ადამიანები ეწინააღმდეგებიან კონკრეტულ ენერგეტიკულ პროექტებს, მათ შორის დარიალის, ლარსის, ყაზბეგის ჰიდროელექტროსადგურების მშენებლობას, თუმცა მინისტრს კონკრეტული სახელები და გვარები არ დაუსახელებია.

myquiz