საკონსტიტუციო კომისია შესაძლოა "თავისუფალმა დემოკრატებმაც" დატოვოს
საკონსტიტუციო კომისია შესაძლოა უახლოეს მომავალში "თავისუფალმა დემოკრატებმაც" დატოვოს, - ამის შესახებ ჟურნალისტებს პარტიის ლიდერმა შალვა შავგულიძემ განუცხადა.
როგორც შავგულიძემ აღნიშნა, "ქართული ოცნება" მყარად იცავს იმ პოზიციებს, რომელიც მმართველი ძალის კიდევ უფრო მეტი კონცენტრაციის და არადემოკრატიული განვითარების მანიშნებელია. მისივე განცხადებით, მათ ამის კონკრეტული გეგმა არ აქვთ, თუმცა განვითარებული მოვლენებიდან გამომდინარე საკონსტიტუციო კომისიაში დარჩენის აუცილებლობას ვერ ხედავს.
"არ ვიხმარდი სიტყვას "გეგმა", მაგრამ თუ დადგა აუცილებლობა, ვფიქრობ, ისეთი პირი უჩანს, რომ ჩვენ დავტოვებთ კომისიას. ვინაიდან ის პოზიციები, რომელსაც მყარად იცავს "ქართული ოცნება", ემსახურება მმართველი ძალის კიდევ უფრო მეტ კონცენტრაციას და ქვეყნის არადემოკრატიულ განვითარებას.
ეს ეხება საარჩევნო სისტემას, რომელიც არის შემოთავაზებული. ეს არის არასამართლიანი და ძალიან დიდი ბონუსი აქვს მმართველ ძალას. ამ საკითხს ასევე ორგანულად ებმის პრეზიდენტის არჩევის წესი", - განაცხადა შალვა შავგულიძემ.
საკონსტიტუციო კომისია უკვე დატოვა პარტიამ "სახელმწიფო ხალხისთვის", ხოლო გუშინ ცნობილი გახდა, რომ კომისიას გაემიჯნა პარტია "ნაციონალური მოძრაობაც". უმრავლესობაში კი აცხადებენ, რომ პოლიტიკური პარტიების ეს გადაწყვეტილება მიზნად მხოლოდ პოლიტკური ქულების დაწერას ისახავს.