საქართველო შესაძლოა, სრულ საპარლამენტო მართვის სისტემაზე გადავიდეს
არის მოსაზრება, რომ ჩვენ გადავიდეთ სრულ საპარლამენტო მართვის სისტემაზე, - ამის შესახებ "ქართული ოცნების" წევრმა ზაქარია ქუცნაშვილმა "პალიტრანიუსის" გადაცემა "360 გრადუსში" სტუმრობისას განაცხადა.
მისი თქმით, მმართველობითი რეფორმა "ქართული ოცნების" ხელისუფლების დღის წესრიგის ერთ-ერთი საკითხი იქნება და სერიოზული დისკუსია გაიმართება იმის თაობაზე, თუ რა სჯობს ქვეყნის გრძელვადიანი განვითარებისთვის - საპრეზიდენტო მმართველობის სისტემაზე დაბრუნება, სუფთა საპარლამენტო მმართველობის სისტემაზე გადასვლა თუ ამ ჰიბრიდული სისტემის შენარჩუნება.
"რა თქმა უნდა, მმართველობითი რეფორმა აუცილებელია, იმიტომ რომ დღეს ჩვენ გვაქვს სისტემა, როდესაც უარვყავით საპრეზიდენტო სისტემა, მაგრამ ვერ გადავედით ბოლომდე საპარლამენტო მმართველობის სისტემაზე. რაღაც შერეული მოდელი გვაქვს - არც საპრეზიდენტო და არც საპარლამენტო, ამიტომ ჩვენ მოგვიწევს საზოგადოების ჩართულობით სერიოზული დისკუსიის წარმოება იმის თაობაზე, ქვეყნის გრძელვადიანი განვითარებისთვის რა სჯობს - საპრეზიდენტო მმართველობის სისტემაზე დაბრუნება, სუფთა საპარლამენტო მმართველობის სისტემაზე გადასვლა თუ ამ ჰიბრიდული რეჟმის შენარჩუნება, როცა მთელი რიგი ნიუანსები წარმოშობს ბუნებრივ კოლიზიას ხელისუფლების განშტოებებსა თუ კონსტიტუციური თანამდებობის პირებს შორის. ასე რომ, ეს საკითხი აქტუალური საკითხია და დღის წესრიგში იქნება. არის მოსაზრება, რომ ჩვენ გადავიდეთ სრულ საპარლამენტო მართვის სისტემაზე, როგორც ეს არის ევროპის სახელმწიფოთა უმრავლესობაში და ამითაც მოვახდინოთ ჩვენი სისტემის ჰარმონიზება ევროპულთან", - განაცხადა ზაქარია ქუცნაშვილმა.
აღსანიშნავია, რომ გუშინ პარლამენტის ვიცე-სპიკერმა მანანა კობახიძემ არ გამორიცხა, რომ კონსტიტუციის გადასინჯვის ფართო ფორმატში, შეთანხმება ორპალატიანი პარლამენტის ამოქმედებაზე შედგეს.