როგორ ვრცელდება რუსული პროპაგანდა საქართველოში ?
IDFI-ს მიერ მომზადებული პოლიტიკის დოკუმენტში "კრემლის საინფორმაციო ომი საქართველოს წინააღმდეგ: პროპაგანდასთან ბრძოლის სახელმწიფო პოლიტიკის აუცილებლობა," ორგანიზაცია საქართველოში კრემლის პროპაგანდის მახასიათებლებს, ძირითად გზავნილებს და ქართულ საზოგადოებაზე მათ გავლენას მიმოიხილავს.
დოკუმენტის მიხედვით, საქართველოში კრემლის პროპაგანდის ძირითად საყრდენი მედიასაშუალებებია. კერძოდ, მინიმუმ ერთი ტელევიზია, რამდენიმე ინტერნეტ-ტელევიზია, ბეჭდური გამოცემა და ვებ-გვერდი გამოირჩევა ანტი-დასავლური "მესიჯ-ბოქსით" და ინფორმაციის გავრცელებისას ძირითადად ეყრდნობა რუსულ წყაროებს.
საქართველოში კრემლის პროპაგანდის კიდევ ერთ მნიშვნელოვან საყრდენად პრორუსული არასამთავრობო ორგანიზაციების ქსელი სახელდება, მათ შორის, "ევრაზიის ინსტიტუტი" და "ევრაზიული არჩევანი".
IDFI-ის შეფასებით, საქართველოში კრემლის პროპაგანდის გამავრცელებლები ფართოდ არიან წარმოდგენილნი პოლიტიკურ სპექტრში და საქართველოს ეკლესიის კონსერვატიულ ფრთაში.
"საქართველოს ჟურნალისტური ეთიკის ქარტიის" აღმასრულებელი დირექტორი, ნატა ძველიშვილი IDFI-ის მიერ ჩატარებული კვლევის შედეგებს იზიარებს და აცხადებს, რომ საქართველოში რუსული პროპაგანდა გაძლიერებულია და მედია ამის მთავარ იარაღადაა გამოყენებული.
პოლიტიკურ პარტიები, რომლებიც რუსულ განწყობებს ღიად გამოხატავენ, ცხადია, საზოგადოებამდე ინფორმაციის მისატანად მედიას იყენებენ.
უნდა გამოვყოთ ორი ტიპის მედიასაშუალებები: ერთ ნაწილს თავისი პრორუსული ორიენტაციის შესახებ ღიად აქვს გაცხადებული, მეორე ნაწილი კი ჩრდილოელი მეზობლის მიმართ თავის დამოკიდებულებას ღიად არ აჩენს, თუმცა დასკვნის გამოტანა რთული არაა, როცა სტუმრად ამგვარი რიტორიკის ადამიანები ჰყავთ მოწვეული და ჟურნალისტები მსგავსი რესპონდენტებისთვის კრიტიკული შეკითხვების დასასმელად კარგად მომზადებულები არ არიან, შესაბამისად პროპაგანდის იარაღები ხდებიან." -აცხადებს ქარტიის აღმასრულებელი დირექტორი.
ALLNEWS.GE -სთან საუბარში, მან ასევე აღნიშნა, რომ მსგავსი პროპაგანდის შედეგად, მოსახლეობაში პრორუსული განწყობის გაძლიერება და ანტიდასავლური დამოკიდებულების ზრდა შეინიშნება, რაც მედიასაშუალებების ზეგავლენის შედეგია.
რუსეთთან დაკავშირებული თემების გაშუქებასთან დაკავშირებით, IDFI მედიასაშუალებებს რეკომენდაციებს სთავაზობს: კრემლის საინფორმაციო ომი ოფიციალურად უნდა განისაზღვროს საფრთხედ შესაბამის დოკუმენტებში; მთავრობამ პროპაგანდასთან ბრძოლის ერთიანი და ადეკვატური სტრატეგია უნდა შეიმუშავოს; სასურველია, სახელმწიფო უსაფრთხოების სამსახურმა პროპაგანდასთან ბრძოლა საქმიანობის ერთ-ერთ პრიორიტეტულ მიმართულებად გამოაცხადოს; საქართველოს მთავრობამ დეზინფორმაციის ანალიზის, რეაგირებისა და პორპაგანდასთან ბრძოლის კოორდინაციის ჯგუფი უნდა შექმნას; საჭიროა ერთიანი გზავნილი ხელისუფლების მხრიდან ევროპული და ევრო-ატლანტიკური ინტეგრაციის შესახებ; უნდა გაიზარდოს არასამთავრობო ორგანიზაციების ფინანსური გამჭვირვალობის სტანდარტები; საქართველოს მთავრობამ მიზნობრივი პროგრამების განხორციელებით ხელი უნდა შეუწყოს ეთნიკური უმცირესობებით დასახლებულ რეგიონებში ადგილობრივი მედიასაშუალებებისა და სამოქალაქო ორგანიზაციების განვითარებას და საზოგადოებრივმა მაუწყებელმა უნდა მიიღოს მონაწილეობა დეზინფორმაციის წინააღმდეგ ბრძოლაში.
მარიამ მენაბდიშვილი