ისლანდიის საგარეო საქმეთა მინისტრი - მოხარული ვარ, რომ საქართველოსთან თავისუფალი ვაჭრობის შეთანხმება გავაფორმეთ
ისლანდიის საგარეო საქმეთა მინისტრი ლილია ალფრედსდოტირი საქართველოსთან თავისუფალი ვაჭრობის შესახებ შეთანხმების გაფორმებას სოციალურ ქსელ "ტვიტერში" ეხმაურება.
"მოხარული ვარ, რომ თავისუფალი ვაჭრობის შესახებ შეთანხმება გავაფორმეთ და ერთმანეთს ხელი ჩამოვართვით. საქართველოს დროშის ფერებში მაცვია. ვიცე-პრემიერი დიმიტრი ქუმსიშვილიც ბედნიერი ჩანს", - წერს ლილია ალფრედსდოტირი და აქვეყნებს შესაბამის ფოტოს.
გუშინ საქართველომ ევროპის თავისუფალი ვაჭრობის ასოციაციასთან (EFTA) თავისუფალი ვაჭრობის შესახებ შეთანხმება გააფორმა, რომელიც შვეიცარიას, ლიხტენშტაინს, ნორვეგიასა და ისლანდიას აერთიანებს.
დოკუმენტს ბერნში, საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა, შვეიცარიის კონფედერაციის ფედერალურმა პრეზიდენტმა, ეკონომიკის, განათლებისა და კვლევების მინისტრმა იოჰან შნაიდერ-ამანმა და EFTA-ს ქვეყნების მინისტრებმა მოაწერეს ხელი.